Bermudez ta clarifica 'discrepancia' cu Banco Central

ORANJESTAD - Minister Bermudez a purba clarifica e 'discrepancia' cu tin cu cifra di Banco Central. Esey despues cu a bin polemica cu cifranan di Banco Central ta diferente cu esun di gobierno y esey tambe a keda ilustra ayera den e rapport di CAft, e colegio di supervision financiero. Y e asunto a haya mas atencion ora cu oposicion a haya un presentacion na CBA riba e diferencia di cifra y a cuestiona e actitud di e mandatario pa cu Banco Central.  

CLARIFICACION

Pa medio di un comunicado,  e mandatario ta bisa cu tur aña e ta composita e presupuesto anual di pais Aruba basa riba nos ley di contabilidad. Parti di e proceso aki ta encera cu e presupuesto ta wordo comenta tanto pa Raad van Advies como tambe e colegio CAft pa finalmente wordo trata den parlamento, pues e ley di Contabilidad y LAft ta e base legal pa nos cifranan. Minister Bermudez ta al tanto cu recientemente Banco Central a duna miembronan di partido MEP un presentacion cu splicacion adecuado riba e diferencia cu a surgi despues cu Banco Central a publica su propio composicion di cifranan di 2015.

COMENTARIONAN OPOSICION INCOMPRENDIBEL Y INACEPTABEL

Segun e mandatario di finanzas e comentarionan difundi pa miembronan di oposicion despues di nan encuentro cu Banco Central ta incomprendibel y inaceptabel, pues desde aña pasa e colegio CAft ta supervisa e ehecucion di e presupuesto a base di e reportahenan cu e propio ministerio y departamentonan concerni ta traha cada 3 luna. Minister Bermudez ta enfatisa cu na fin di aña, e cuenta anual aki ta wordo concipia, controla pa CAft y nos Contraloria General, pa despues wordo trata y aproba pa parlamento a base di nos ley di Contabilidad. "Asina ta cu mi tin basta siguridad pa garantisa cu e cifranan ta realistico y corecto!", e mandatario a expresa. Minister di finanzas ta splica cu esaki no ta kita cu cualkier oficina di accountant, instancia, departamento, of experto por composita nan mesun cifra y controla si nan ta cuadra cu e cifra cu Gobierno ta presenta, pues e cifranan aki ta publico. Sin embargo den caso cu e cifranan aki no ta cuadra y ta saca un otro resultado, e ta keda na e compositor pa splica dicon tin un diferencia p'asina no surgi ningun confusion. "Mi no ta kere cu ta husto cu cada bes mi departamento di finanzas cu su recursonan limita, mester bay soluciona e puzzel", Minister Bermudez a informa.

Na mes momento e mandatario di finanzas a duna di conoce cu practicamente tur siman tin dialogo cu e presidente di Banco Central y mensualmente cu e hunta di comisario di banco tambe. "Te unda mi sa, na ningun momento nan a expresa un falta di respet pa of di mi persona!".