Fundacion Lisette Gomes ainda wardando riba reaccion di minister Croes

ORANJESTAD - Fundacion Lisette Gomes nunca a menciona “meldpunt” den e manifesto entrega algun tempo pasa. E fundacion pa medio di un comunicado diahuebs a clarifica e punto aki. Segun e fundacion, referiente na e declaración di sr. Minister Paul Croes,  Fundacion Lisette Gomes kier a trese   padilanti cu e fundacion ta wardando ainda ariba un reacción por escrito di sr. Minister Paul Croes pero tambe di e Presidente de Parlamento di Aruba. " Parlamento di Aruba ta e órgano máximo cu por exigi di un minister pa e atende un problemática mas liher cu ta posibel, vooral si e tópico ta uno delicado pero sumamente urgente. Lamentablemente Fundacion Lisette Gomes mester a tende via medionan di comunicación e declaración di sr. Minister Paul Croes. Nos ta expresa e speransa cu ainda e caminda di dialoga cu e sr. Minister ta habri y cu pronto nos lo risibi por escrito su puntonan di vista pero tambe su plan di acción" e fundacion a sigui bisa. 

MELDPUNT

Segun e fundacion, si minister Paul Croes a lesa e manifiesto, e lo a ripara cu na ningun momento a menciona meldpunt ariba e manifiesto. Locual cu Fundacion a puntra y pidi den e reunion di Parlamento (como aanvullend) dia 3 di Mei ultimo, ta over di un meldcode, cu si e lo wordo introduci y si ta asina con leu nan ta cu esaki." Ta di lamenta cu Minister Paul Croes no a tuma ni sikiera un tempo pa lesa e manifiesto y mucho menos pa contact e Fundacion pa asina sinta na mesa pa asina nos trese nos preocupacion nan pa e por comprende na unda nos kier jega cu esaki" 

NADA AINDA DI CONTACTO

Nan ta recorda e mandatario cu e manifiesto su deadline tawata dia 27 di mei ultimo, y cu e Fundacion a sinta un paar di dia despues cu a entrega esaki cu comicion Husticia y tambe cu comicion Social di Parlamento. A sinta tambe cu Minister di Husticia Sr. Arthur Dowers, den e mesun reunión aki Hoofd Officier y Voogdijraad tambe tawata presente. Lesa e comunicado completo aki. Nota. Foto di archivo di e manifestacion un luna pasa.