Pontilius: Pa diabierna kier tin e asunto di ex Aura Casino resolvi

ORANJESTAD - Tanten cu tin un grupo interesa, partidonan lo sigui negosha. Esey ta e punto di bista di mediado di gobierno Anselmo Pontilius na NoticiaCla.com riba e situacion di ex Aura Casino. Esey no ta kita afor cu e sindicato FTA tin su punto di bista relaciona cu e licencia unda cu nan a pidi pa revoca esaki pa incumplimento. Pontilius a tuma nota di esaki, y a mustra cu si dicidi p.e. di revoca e licencia p.e. awe mainta mientras cu ta negociando, ta stroba e oportunidad di un grupo di trahado pa haya trabou. Mes momento sinembargo, Pontilius ta compronde cu no por crea un precedente pa laga un negociacion sigui eternamente. Pa diabierna ta spera cu por resolve e punto aki. 

INTERES DI GRUPO

Pontilius a mustra cu den curso di diahuebs (awe) lo tende di e grupo interesa pa tuma e casino over, pa wak con leu nan ta realmente. Tin tres punto cu ta stroba e negociacion, y cu ta identico di e problema di e grupo anterior. Entre nan, tin problema cu e cantidad di trahado, e lunanan di salario cu no a wordo paga, y cuanto trahado mester tuma ora cu e casino habri su porta atrobe. Esey no ta nifica cu partidonan ta leu di otro. "E grupo a bisa cu kier opera e casino, y tin cu yega na acuerdo riba e tres puntonan concreto."

TARDA PA CASINO HABRI BEK

A mustra tambe cu ora cu e deal keda cera, lo dura un poco si prome cu e casino por habri. "Mester por lo menos un trabou di renobacion. Nan mester di busca ficha, machine, mesa, cambio di tapijt etc. E ta costa nan un luna di mei maximo, pero esey no ta bira un problema". Pa loke ta e deadline cu tabatin pa termina e negociacion of perde licencia, Pontilius a mustra cu berdad por tin mil deadline, pero tanten no yega na un acuerdo bo no tin nada. Segun minister di labor Paul Croes a bisa tambe, cu no tin alternativa y cu lo tin cu revoca e licencia. Pero, si esey sosode, e ta nifica tambe final di e storia segun mediado di gobierno. Mes momento Pontilius no ta spera cu tin cu yega asina leu y cu ainda partidonan por bisa cu nan por supera e tres puntonan di conflicto.