Herde: Ainda ta papiando con pa resolve e 'bululu' di parlamento

DEN HAAG - Lider di fraccion di partido AVP Rene Herde a confirma for di Hulanda awe mainta cu enberdad e problema di e 'bululu' den parlamento di siman pasa, 'no ta uitgepraat'. Vice Presidente Chris Dammers den un declaracion breve na NoticiaCla a bisa awe mainta cu Ministerio Publico ta haciendo su trabou di investigacion, y mas e lo no bisa aworaki. Tabata e siman aki cu presidente di parlamento Marisol Lopez Tromp a confirma na NoticiaCla.com cu e caso no ta 'resolvi' ainda contrario na declaracion haci pa vocero di gobierno Armando Villasmil na vespertino Amigoe. Otro siman ora cu tur hende ta bek na Aruba nos ta pone cabes hunto y den forma hopi racional y cu responsabilidad lo discuti kico otro nos haci" Herde a bisa NoticiaCla.com. 

NO TA UITGEPRAAT AINDA

"Si si si" Herde a contesta riba e pregunta cu cos no ta uitgepraat. Mes momento a bisa tambe cu minister presidente a papia cu tur hende, pero e mes como lider di fraccion no a haya e oportunidad pa papia cu tur hende pasobra e ta na Hulanda ainda. Loke mester sali for di e combersacionan aki, ta cu mester preveni y pa algo asina hamas bolbe sosode den parlamento. 

PERCEPCION 'KOEK EN EI'

E percepcion cu tur cos ta 'koek en ei', esta normal, tambe ta robes segun Herde. E hecho cu Lopez ta trahando na Hulanda cu IPKO y cu Dammers na Aruba ta presentando na p.e. eventonan, sinembargo ta duna e impresion cu tur cos ta ok. "No. E no por ta e caso (di ta normal) di un incidente serio asina. Bo no por djies pone un banda. Tur hende tin cu carga nan responsabilidad. Pero parlamentario ta sigui cu su trabou normal. Den e caso aki mirando cu parlamento ta e organo di mas halto, ningun hende por bisa bo bay cas, warda" Herde a bisa. Pues den e caso aki tin regla y norma diferente pa e dos personanan aki. Esey no ta nifica cu no ta buscando un solucion preventivo pa futuro.