Reduccion di tarifa di parkeer no ta afecta business plan di Aruparking

ORANJESTAD - Ahustacion di tarifa di parkeer manera anuncia diaranson, no ta perhudica e business plan su meta pa genera fondo pa e compania. Asina director di Arubus (doño di Aruparking) Teo Croes a sigura NoticiaCla.com. "Nos tin un buffer, caminda cu nos por cumpli cu esaki sin cu e ta afecta nos business plan hopi" Croes a bisa. E meta principal segun Croes, pa bin cu Aruparking tabata pa tin miho acesibilidad pa caya grandi, y tambe resolve e situacion di 'fout parkeren'. E intencion berdad ta cu entradanan di Aruparking tin cu reduci e subsidio pa Arubus. 

AHUSTE 

Tabata diaranson cu Aruparking a anuncia un 'ahustacion' di su tarifanan pa parkeer. Esaki ta basa riba estudio cu a wordo haci unda cu a resulta cu mientras cu ta contento cu e producto, e problema ta e tarifa cu ta wordo considera como 'halto'. Basa riba peticion di minister president, minister di transporte y sindicato FTA, lo ahusta e tarifa entrante 1 di juli pa e trahadonan den caya grandi y alrededor. E forma con a atende cu esaki ta cu personanan cu ta cobra bou di 1700 florin lo haya tarifa di 25 florin na lugar di 60 florin. Esnan riba 1700 florin ta 35 florin, esnan cu ta gana entre 2000 pa 2500 florin ta bira 45 florin y riba 2500 florin ta keda 60 florin pa luna. Esnan cu ta bin na remarke tin cu presenta un carta di dunador di trabou pa por atende cu esaki. 

AUMENTO DI TRAFICO

Pa contra aresta e pensamento cu Aruparking no ta funciona, a mustra cu segun cifra divulga, Aruparking ta genera 60.000 transaccion pa luna, cu ta nifica 13 pa 15.000 transaccion pa siman. Esey ta nifica cu basta hende ta bin caya, los di e parti di 'vrij parkeren'. Como tal segun Croes, e ta indica cu pa luna tin por lo menos 120 pa 130.000 hende ta bin caya grandi. Si analisa e cifra cu e proyeccion cu Aruparking tabatin, e ta cuadra bon segun Croes a bisa. Mes momento Croes a remarca si cu ainda falta mas fase pa keda introduci y cu e operacion no ta 'full fledge ainda' esta cu no ta full operacional. E porcentahe cu ta bezig cu ne, nan ta satisfecho cu ne. 

AINDA NO TA CLA PA FASE 2

Mes momento Croes a confirma cu ainda no ta cla pa introduci e fase 2 cu ta e parkeermeter na sector di hotel. "E ta den bespreking ainda cu gobierno, pasobra mester crea e parti di infrastructura. Ainda no a haya e ultimo feedback for di gobierno riba esey" Croes a bisa. Pero no por a duna un fecha exacto pa e parti ey cuminsa.