Lopez Tromp: Asunto di confrontacion den parlamento no ta soluciona!

DEN HAAG/ORANJESTAD - Ningun momento e asunto di confrontacion den parlamento siman pasa a wordo soluciona. Por lo menos, no segun un di e protagonistanan Marisol Lopez Tromp a declara for di Hulanda ayera. Den un reaccion na e vespertino Amigoe, a manda coregi un articulo anterior cu e vespertino a publica basa riba un entrevista cu e vocero di gobierno Villasmil. Lopez Tromp a sigura NoticiaCla.com tambe cu cos 'no ta uitgepraat', y cu ta solamente un combersacion tabatin cu lider di partido Mike Eman. A resulta cu e combersacion tabata solamente entre nan dos, y ningun otro hende mas, pues tampoco cu e vocero. Lopez Tromp a haya ta bon pa clarifica pues cu e situacion ainda no tin solucion y cu tin mas combersacion pendiente. Lopez Tromp ta na Hulanda actualmente atendiendo reunionan di IPKO. 

E ENCUENTRO CU LIDER DI PARTIDO

Manera cu a keda raporta caba, prome minister Mike Eman den su calidad como lider di partido (AVP) a reuni cu tanto presidente y vice presidente di parlamento, respecticamente Marisol Lopez Tromp y Chris Dammers diabierna ultimo. Tabata diabierna cu NoticiaCla.com den forma di primicia a informa cu Eman lo a bin afo despues di a atende e asunto aki internamente. Y despues di esey, enberdad ta mira cu esey a sosode awo. Sinembargo no a bisa si a reuni cu nan hunto, of cada uno separa. Tambe ta bisa cu e situacion no ta resolvi ainda y cu 'lo tin siguimento riba e reunion aki'. 

ENFOKE DI E ENCUENTRO AKI

Segun e comunicado, e enfoke di e encuentro aki ta preocupacion di e lider di AVP y comunidad cu e sucedido den Parlamento entre e dos miembronan di partido. " Minister President Mike Eman a sostene e reunion aki den su calidad di lider di partido AVP. E proceso cu a wordo inicia cu e dialogo aki ta pa tin un refleccion conhunto riba e sosedido" e comunicado ta sigui bisa.

ALGO ASINA NO MAG RIPITI  

Segun e comunicado, Eman kier a pone central cu 'algo asina no mag di ripiti su mes'. "Cu reconocimiento di gravedad di e sucedido, e dialogo cu a ser inicia por yuda conduci na un apertura pa un relacion di trabou positivo basa riba respet mutuo, cu e honor y dignidad di cada un pa nan mes y pa cu nos comunidad". Lider di AVP, Mike Eman, a expresa cu "ambos persona tin un trayectorio respetuoso y un preparacion debido pa por carga nan posicion cu capacidad, honor y dignidad".

LO TIN MAS REUNION

Ademas a informa cu " lo tin siguimento riba e reunion aki pa esaki por keda evidente tambe den futuro serando e capitulo aki cu reconocimento necesario di e gravedad di locual a sosode y cu compromiso pa sigui padilanti na servicio di comunidad den un forma honorabel y cu balornan pa cual esnan envolvi semper a para p'e y cu ta forma parti di normanan tambe central pa e organisacion politico cu tanto Presidente di Parlamento Sra. Marisol Lopez-Tromp y Sr. Chris Dammers ta representa" Eman a sigui bisa.

LOKE E COMUNICADO NO TA BISA

Loke e comunicado no ta bisa, ta ki paso lo tuma contra e dos personanan aki, of si a impone un tipo di 'sancion' contra un di e dos personanan aki of no. Di otro banda, e comunicado ta bisa si cu ta e prome reunion (posiblemente di varios) unda cu ainda lo tin cu determina kico tin cu haci contra e dos personanan aki, of si ta resulta cu esaki no ta necesario. Mientrastanto trabou ta sigui, unda cu e presidente di parlamento a biaha of ta biahando pa Hulanda pa por lidera e reunionan di IPKO cu ta cuminsa diamars proximo na Hulanda. Dammers ta keda Aruba y no ta participa den e reunionan aki.