Fundacion Hende Muher den Dificultad a haya un auto nobo for di Garage Centraal Aruba

ORANJESTAD – Ayera Garage Centraal Aruba tabatin e privilegio di por haci un tremendo donacion na Fundacion Hende muher den Dificultad, den forma di un Hyundai Grand i10 nobo. Como parti di e comunidad Arubano, Garage Centraal Aruba ta reconoce e problema presente den nos comunidad relaciona cu maltrato di hende muher, y e consecuencianan cu esaki ta trece pa nos comunidad. Esaki ta un problema cu no solamente ta afecta e hende muher, pero su yiunan tambe.

AUTO SIN NINGUN COSTO

Ta asina cu e Fundacion tabata buscando un auto confiabel pa cumpli cu funcionnan crucial pa nan funcion, y ora nan a acerca Garage Centraal Aruba inicialmente nan a pidi pa un descuento. Gerencia di Garage Centraal Aruba a reconoce e importancia di e labor crucial cu e auto aki lo cumpli cu ne, y e decision a ser tuma di ofrece e Hyundai Grand i10 nobo na e fundacion sin ningun costo pa nan.

USO DI E AUTO

Fundacion Hende Muher den Dificultad lo haci uso di e auto aki pa pasa busca esnan cu mester ayudo di e fundacion aki, sea pasobra nan tin cu bay busca conseho legal of, pio ainda, pasobra nan ta bou risico inminente di ser maltrata. Nan ta ser hiba unda cu nan mester, manera centro di cuido medico unda nan por deal cu nan heridanan. Y hopi biaha e damanan aki ta compaña dor di nan yiunan, cual tambe lo mester ser transporta algun caminda, manera nan skol.