Trabounan di Green Corridor a yega Pos Chiquito

ORANJESTAD – Trabounan di Green Corridor a yega Pos Chiquito. Proyecto 'Green Corridor' ta avansando segun informacion di gobierno, y nan ta considera cu esaki ta sosodiendo di un manera 'sumamente satisfactorio'. Manera planea, e prome parti di asfalt a yega Pos Chiquito caba y trabounan den Pos Chiquito mes a cuminsa algun siman atras.

PARTI COMPLICA

E parti mas complica di e proyecto ta cuminsa na Pos Chiquito caminda por mira basta material y ekipo caba den e area. E brug nobo di Pos Chiquito, cu ta bou construccion caba y manera hopi sa, esun actual ta bay wordo drecha y ta bay tin un caminda pa cana y tambe uno pa core bicicleta.

BARIO DI POS CHIQUITO

Den e bario di Pos Chiquito mes, a cuminsa cu e trabou pa construi e dos vianan nobo mientras cu na mesun momento ta trahando riba embeyecemento di e area na banda. Na Pos Chiquito, y Savaneta, e casnan ta construi relativamente leu di e caretera, cual ta permiti automobilistanan subi e caretera na cualkier punto.