E prome di 4 dia di careda/canamento di Aruba Bank ta un hecho!

ORANJESTAD - E prome di 4 dia di careda/canamento di Aruba Bank a cuminsa diamars atardi na e rotonde di Paradera cu mas di 2.500 participante. Miles di participante a uni den nan dri-t-shirt pa participa na e prome ruta di 5.4 kilometer di 4 dia di canamento, unda cu varios a cana mientras otronan a core. Riba e drone view di NoticiaCla.com por haya un bista di ariba di e preparacion, y tambe e persona cu a drenta prome despues di a core e prome ronda. 

OTRO DIANAN

Segundo dia, cual ta riba diaranson, e caminata lo sali for di Fisherman’s Hut y lo tin un ruta di 5.3 kilometer. Manteniendo nos mes na peticion y pa garantisa siguridad di nos participantenan, ta pidi tur hende pa mantene nos mes na man drechi di caminda durante e ida y buelta di e ruta aki. Pa e ruta aki tambe ta conta mescos pa bisti colornan cla, y Aruba Bank un bes mas lo pone extra luz. Pa parkeo por pensa canto di caminda dilanti e casnan di Malmokweg, Saliña, y tambe mas cerca di Bakval, e caminda dilanti Marriot y Ritz Carlton. Mirando cu tin hopi biento, lo pone extra bari di sushi specialmente ariba e ruta aki cu ta canto di lama.  Tercer dia, cual ta diahuebs, dia 2 di juni, e caminata lo sali for di Aruba Bank San Nicolas, y e ruta lo ta uno di 4.8 kilometer. E dia aki tambe tin e actividad semanal Carubbian, pues lo por bira extra druk ariba caminda. Ideanan pa parkeer ta e Bushalte, den caya mes, y Carnaval Village. Pa e ruta aki tambe ta conta e conseho di tene nos mes na man drechi di caminda pa siguridad di e participantenan. Finalmente, dia 4, cual ta diabierna, dia 3 di juni, e caminata lo sali for di Aruba Bank Camacuri y e ruta lo ta uno di 6.8 kilometer. Pa e ruta aki al igual cu esnan anterior ta pidi tur participante pa mantene e regla di keda na man drechi di caminda pa motibonan di siguridad. Ariba tur ruta lo conta cu sosten di Cuerpo Policial, Rode Kruis, y tambe boluntarionan pa percura siguridad di tur participante. E aña aki tin mas di 2500 persona cu a registra. Lo tin premionan atractivo pa e coredonan individual, pa e grupo di mas grandi, pa e grupo mas anima y pa e grupo miho uniforma.

Un palabra di danki ta bay na tur partner cu ta haci e evento aki posibel y uno exitoso, cualnan ta Subway y IBISA cu a asisti y realisa e actividad aki. Danki tambe na Cuerpo Policial pa nan sosten, na Rode Kruis y otro boluntarionan di IBISA y Aruba Bank. 

Pa mas informacion, incluyendo e rutanan, bishita e website di e evento: https://walk-and-run.arubabank.com. FOTONAN CORTESIA www.noticiacla.com