Corte: Ex director Parke Arikok a acusa directiva di mal maneho

ORANJESTAD - Cu tin un diferencia di opinion grandi entre e ex director di Parke Nacional Arikok y e actual directiva tabata obvio den corte diamars mainta. Emil Ter Horst despues di a warda 4 luna pa e caso tuma lugar, a haya su oportunidad pa purba demonstra pakico e actual directiva di e parke no merece di keda den nan funcion y cu nan tin cu wordo retira. Di banda di e directiva, a purba desbarata cada punto treci dilanti pa Ter Horst, indicando cu e alegacion di e ex director tabata un sin fin di 'conclusionan infunda' y cu mester declara e peticion di Ter Horst como no admisibel. Aki 3 siman hues ta dicidi riba e caso aki. 

CASO MANEHA VIA CORTO CIRCUITO TV

E caso riba su mes tabata uno particular den sentido cu mester a busca un hues di Corsou pa evita 'conflicto di interes', mirando cu e casa di Ter Horst ta hues di profession. Loke a haci e caso unico, ta cu enbes cu e hues biaha bin Aruba, a opta pa uza tecnologia moderno pa trata e caso via corto circuito televisivo di corte. Cu imagen y zonido perfecto, e caso por a continua cu un hues dirigiendo su corte 'virtual', y e abogadonan presentando nan defensa dirigi na un pantaya di television. 

RECHASO PA GRUPO DI SOSTEN DI TER HORST

For di inicio a nota cu tabatin problema ora cu hues no por a haya su mes cu e peticion di e grupo di simpatisantenan di Ter Horst, conoci como e 'Grupo di Interesado' y algun otro interesado cu kier a sostene e ex director y tambe forma parti di e 'ekipo'. Falta di presencia fisico di mayoria di nan y un inabilidad di proba informacion concreto di tur esnan cu tin interes, hues despues di un ora di argumentacion, a dicta cu e ta rechasa e peticion di e grupo aki y lo basa su mes solamente riba Ter Horst y su defensa. Un desicion cu despues Ter Horst a lamenta y ta atribui na miedo di represaya y otro posibel motibo di e ausencia di su 'grupo'. "Nan lo por vocifera nan mes despues di otro forma awor cu e caso a tuma lguar" Ter Horst a bisa NoticiaCla.com na final di e caso. 

ABOGADO DE CUBA

Abogado defensor di Ter Horst, Jeanot de Cuba a mustra cu e meta di su cliente tabata simpel. Demonstra cu e directiva a presta mal administracion.  “En bista di e hecho cu aki ta trata di un fundacion cu tin un tarea stipula den ley, den statuten y cu ta goza subisdio procedente di fondo publico y en bista di e hecho cu den practica niun hende no ta controla maneho di Arikok Ter Horst a suplica hues pa apunta un tercer partido experto, independiente y capaz, pa investiga e maneho di e directiva actual y establece si berdaderamente tin e “wanbeheer”  cu ta rekeri pa duna e bestuur/voorzitter ontslag.”

Pa proba esaki, e abogado a uza un defensa di casi 10 pagina, den cual el a pinta un cuadro extenso di kico tur su cliente ta wordo acusa di dje, kico tur el a haci, y con el a wordo stroba di fungi como director. 

PROBLEMA NA 2015

Segun abogado de Cuba, e persecucion contra su cliente a inicia na 2015, cu a desemboca den desolvimento di su contracto. E caso ey e no por a apela aunke el a haci e intento necesario despues pa medio di un caso sumario. Esey ainda e ta wardando e resultado di dje. Minister responsabel (Mike de Meza) no tabata reacciona riba su kehonan como 'soplon'. Esey mientras cu Ter Horst tabata goza di sosten di su trahadonan. Fayo cu e plan di maneho di e parke, uzo incorecto di statuto di e parke, falta di registro di reunionnan (notulen), nombracion incorecto di directiva, y un cantidad di cosnan mas. Un di e puntonan cu e abogado a relata expresando asco, ta e desicion di e presidente di directiva (Greg Peterson) di firma un acuerdo pa un filmacion den un di e cuevanan yena cu 'vleermuis', violando tur posibel regla di naturalesa y fatsoen. E constelacion di e directiva tambe a keda cuestiona, y no tabata conforme regla. A culpa Peterson di unilateralmente procesa cu nombracion di miembronan sin cu esaki tabata posibel. Na final, a pidi pa retira Peterson di su funcion, y cu ne, henter e directiva. 

ABOGADO ARENDS-MARCHENA

Abogado di e contra partido, Zuhaila Arends Marchena no a perde tempo pa pinta un plachi negativo di Ter Horst, unda cu den algun frase a pinta un persona cu tabata gasta mas placa di loke e tabatin, cumpra cosnan cu no tabata presupuesta, y asina a sigui menciona un lista di cos. A considera e acusacion di e abogado di Ter Horst como 'hechos sin esencia'. Despues a sigui pa desbarata e punto di constelacion ilegal di e directiva, siguiendo un liña di tempo pa demonstra cu cos a bay 'segun regla y orden'. Notabel tabata e hecho cu Arends a acusa de Cuba di ta 'troce e hechosnan'. "Tur ta conclusionan infunda!". Ademas a mustra cu e directiva actual, cosnan a te hasta mehora den e parke. "Nos no ta desmenti cu tin algun problema" Arends a bisa. A mustra cu e loke cu e ex director tabata practica ta cosnan di un mundo 'bira'. "Bo no ta haci bo trabou pero ta culpa otro di e fayonan. E mester a simplemente cumpli cu su lista (di trabou). A splica e parti di subsidio y a purba hustifica e maneho di e directiva pa cu e proceso atendi, contradiciendo e ex director su alegacion cu cosnan no tabata wordo haci corectamente. Na final a pidi hues pa rechasa e peticion di e ex director esta pa baha e actual presidente di directiva y disolve e director y declara esaki pues 'inadmisibel'. Hues a cera e tratamento y a informa cu lo dicta un sentencia aki 3 siman, dia 21 di juni.