Elmar: Fayo den kabel grandi, causa interupcion di coriente

ORANJESTAD - “Nos ta lamenta e situacion cu a presenta ayera nochi, cu den su mayoria no tabata den nos man of cu nos por a controla”, asina Wanda Broeksema di N.V. ELMAR a duna di conoce. E ta referi na e fayo cu a presenta y cu a conduci cu varios area tabata sin coriente. El a sigura cu e tecniconan di e compania di distribucion di coriente a traha den forma incansabel pa por a logra reconecta clientenan mas lihe posibel. E situacion tabata mas fastioso pasobra tabata den marduga.

FAYONAN

E prome fayo a presenta rond di 11:00 pm den area di Ponton, ora cu diripiente coriente a bay. Pa 11:39 pm a reconecta e prome area bek cu coriente, sigui pa 12:39 am y e ultimo grupo a haya coriente rond di 2:25 am. E fayo tabata den un kabel grandi cu a laga algun area specifico den Ponton y Oranjestad sin suministro di coriente.

ACCIDENTE DI AUTO 

Comosifuera poco, meymey di tur e presion pa tecniconan logra “isola” e fayo pa por reconecta suministro di coriente, ata rond di 1:06 am ta sosode un accidente di auto na Santa Cruz unda ta ranca un palo di luz cu un kabel “hoogspanninglijn” di coriente, cu consecuencia cu Hooiberg, Santa Cruz y Casibari a keda sin suministro. Lamentablemente e fayo ey a dura largo pasobra caminda tabata cera, kabel di coriente benta tur caminda y mester a drecha e palo di luz, etc. Parcialmente por a duna coriente na e areanan cu a perde coriente.

KICO TA SOSODE ORA CORIENTE BAY

Pa publico por compronde bon, ta ora cu coriente a bay 11:00 pm, ta e ora ey tecniconan ta sali pa bay inventarisa e fayo y cuminsa e proceso pa corigi’e y “isola” den e red di distribucion pa reconecta e areanan afecta. Esey ta haci cu tin biaha tin fayonan cu ta facil pa drecha y otronan cu ta mas complica, cu ta dura hopi mas pa regla.

DISCULPA DI PARTI DI ELMAR

“Nos ta consciente di e inconveniencia cu e tipo di casonan asina tin pa nos clientenan pa cual nos ta pidi disculpa. Fayonan por sosode y ta keda na nos tecniconan pa responde di un forma rapido pero sigur y purba pa reanuda suministro den un tempo record. Tin biaha e ta bay facil, pero tin biaha e fayonan por ta asina compleho cu e ta tuma mas empleado, mas experticio y mas material prome cu por keda cla”, asina Wanda Broeksema a termina bisando.