Con empleadonan deteni di Directie Onderwijs a perhudica hopi studiante!

ORANJESTAD – E dos empleadonan deteni di Directie Onderwijs a perhudica hopi mayor y nan yiunan pa un tempo caba. Awor cu e dos personanan a cay sera, storianan a cuminsa los di kico tur tabata pasa den e departamento y e problema cu mayornan tabata pasa pa keda cla cu nan tramite, debi na entre otro e fayonan di por lo menos un di e detenidonan. NoticiaCla tin un di nan storia, unda cu nan ta conta nan experiencia. Mientrastanto, tur dos empleado di Directie Onderwijs cu a cay sera e siman cu a pasa, esta L.T.-G. y V.Q., nan detencion a keda prolonga cu 8 dia mas. Esey ta nifica cu tin suficiente motibo ainda pa no laga nan den libertad. Mes momento tambe NoticiaCla a haya nota di e cargonan oficial cu tin contra e dos empleadonan awor, cu ta falsificacion di documento y of firma, estafa y labamento di placa.

Den un caso particular, un famia (nan a prefera di keda anonimo) a haya nan mes na final di cuenta pa yuda nan yiu cu placa nan mes, pa e no perde e scol y e aña. Nan a conta NoticiaCla cu ya pa varios luna caba hobennan cu ta acercando e Departamento di Fiansa pa Estudio no ta ser atendi debidamente. “Pa varios luna largo e departamento tabata priminti di sigui prepara e proceso necesario pa continuacion di un estudio cu ya tin fiansa caba pa varios aña, y tambe pa percura pa e deposito di e suma necesario riba cuenta di e estudiante pa e por paga su scol” un mayor precupa a bisa NoticiaCla. Segun e mayor aki, tur papel carta y documento a keda entrega na tempo “ Pa simplemente sigui un studielening cu ya caba tabata existi pa varios aña”. “ Pero cada biaha tabata tende cu nan tabata "bezig" cu e fiansa, cu e no tabata cla ainda, cu Dept. di Finanzas tabata tarda, etc.” e mayor a sigui bisa.

Cos a bira asina tenso cu e yiu (nan) mester a biaha pa exterior pa cuminsa nan estudio, sin cu nan a keda cla cu e departamento concerni. “Nos mester a busca placa di otro fondo”. Y esaki pasobra segun e mayor, Directie Onderwijs/Dept. di Fiansa pa Estudio no a deposita ningun cen riba cuenta di e studiantenan te awe,’ pues a laga nan na caya mientras cu pa lunanan largo nan tabata tras di e departamento’ Ora cu nan a tende di e noticia di e detencion, mesora nan a puntra ken ta envolvi, cu miedo cu por ta un di esnan cu tabata atende cu nan. Y lamentablemente nan temor a resulta di ta berdad. E empleado L.T.G a atende cu nan tur e tempo sin cu e por a keda cla. “E departamento hasta a nenga di duna un simple carta pa studiantenan por prueba na scol cu tin un fiansa di Gobierno di Aruba pa nan estudio” e mayor a bisa. “Ora di a bolbe yama un dia prome cu mester a biaha, y a puntra pa esun cu pa varios aña caba ta encarga cu e fiansa, un otro empleado a bisa " L.T.G. ta cu vakantie....nos no por hasi nada pa bo" !:” e mayor a confirma na NoticiaCla.

Cu e situacion actual, e mayornan (y otronan) ta man na cabes pa loke tin cu wordo haci. Nan ta puntra kico e studiantenan aki, cu ta den tur nan derecho y cu tin necesidad financiero pa paga nan estudio, pero cu a keda perhudica cu e situacion actual, mester hasi.” Nos yiu mester stop di studia of mester hiba Gobierno corte?” Tambe nan a reclama cu e mandatario encarga cu enseñansa , Michelle Hooyboer no a haci nada pa remedia e situacion aki. “Minister di Enseñansa nobo actual por sikiera pone un persona encarga pa atende cu e studiantenan aki, pa yuda nan? Esaki ta algo cu mester bin urgentemente pa no sigui perhudica hobennan cu kier studia y cu ya caba tin un fiansa di estudio”, e mayor a bisa finalmente. NoticiaCla a haya como reaccion di e mandatario cu unico cos cu ta wordo bisa riba e tema aki, ta un confirmacion di e hecho di e fraude y otro cargonan, y cu e caso ta bou di investigacion di landsrecherche.