AHATA a organisa tayer 'Siña traha cu Wordpress'

ORANJESTAD -  Recientemente Aruba Hotel and Tourism Association (AHATA) a organisa un curso practico titula “Siña traha cu Wordpress” nivel 1 pa su miembronan. Pa medio di cursonan cu ta relaciona cu tareanan di mercadeo y promocion, como tambe servicio, benta y otro elementonan esencial formando parti di e industria di hospitalidad, AHATA ta asisti su miembronan den e proceso di keda “al dia” cu desaroyonan cu ta yuda nan den nan trabao diario.

E curso di Wordpress a cubri topiconan manera “kico por haci cu Wordpress”, maneho di contenido, elementonan basico pa cu control di contenido, formatonan di media y experticio basico y con pa traha cu Plug-ins.

AHATA a ofrece e curso aki completamente gratis y specificamente na profesionalnan den e ramo di mercadeo y miembronan cu ta interesa den adkiri un miho conocemento di e programa y con pa traha cun’e den un website. AHATA a traha hunto cu Bruce Harms di Defiant Concepts pa ofrece e curso di dos dia den boardroom di AHATA.

Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. AHATA ta traha di cerca cu Aruba Tourism Authority y ta colabora tambe cu Camara di Comercio, ATIA, Asociacion di comerciantenan den caya grandi y cu San Nicolas Business Association. 

E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di "Room Tax" den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta "rev-par" y e suma cu cada turista ta gasta ora ta di bishita riba nos isla.