GKMB:A haya relativamente poco criadero di sangura durante control

ORANJESTAD -Comunidad di Aruba ta haciendo su best pa ta parti di e solucion pa yuda elimina e problematica di criadero di sangura. Esaki ta conclusion di GKMB despues di e accion di swipe, durante cua nan a bishita casnan y negoshinan di Westpunt pa Punta Basora. Hunto cu DOW y Serlimar, nan a bishita 10.691 cas. A haya un total di 639 criadero y 37.366 criadero potencial. A controla, trata y elimina tur criadero. 

CANTIDAD DI CRIADERO

Despues di e accion di swipe, e inspectornan di GKMB a bolbe na 154  di e 521 casnan unda nan a haya criadero pa mira si e habitantenan a sigui instruccionnan cu nan a duna pa por mantene e propiedadnan liber di criadero.

RESULTADO

E accion aki ta dunando su resultadonan na termino cortico caba, mirando cu tin poco caso di dengue, chikungunya y zika na Aruba actualmente. Na termino cortico ora cu awa cuminsa cay ta di spera cu tur hende ta mas consciente y mas activo den mantene nan cas y curanan liber di criadero.

MISSION DI GKMB

GKMB tin como mision pa proteha e populacion di Aruba, incluyendo habitantenan y bishitantenan di e malesanan cu ta wordo transmiti pa sangura, particularmente e sangura aedes aegypti, cual ta presente na tur parti di nos isla. Ademas, GKMB ta enfoca riba educacion di e comunidad pa cu con pa elimina criadero y mantene e isla liber di sangura y e virusnan cu e sanguranan ta transmiti.

TEMPO DI YOBIDA

Durante tempo di yobida GKMB lo ta bishitando casnan atrobe pa asina sigui cu inspeccionnan, brinda guia na comunidad y mantene Aruba mas tanto posibel liber di e sanguranan cu ta trece salubridad publico di Aruba na peliger cu transmision di dengue, chikungunya y zika.

ULTIMO ACCION DI SWIPE

Durante di e ultimo accion di swipe, cu a dura nuebe siman, e inspectornan a topa cu ciudadanonan cu ta mas consciente di nan responsabilidad pa cu nan salud y e salud di nan sernan kier, y bisiñanan.

PETICION DI GKMB

GKMB ta pidi pa cada miembro di nos comunidad, di chikito pa grandi, ta extra atento durante di e temporada nos dilanti, durante cual un simpel yobida chikito ya por resulta den un aumento di e cantidad di sangura.

Por conclui cu e mensahe ta yegando comunidad y nan ta wak e urgencia y importancia di ta un parti di solucion pa e problematica aki, cual si no atak’e na un forma pro activo y firme por hasta causa daño na e industria di turismo, e pilar di nos economia. E mision di GKMB ta pa proteha nos habitantenan di enfermedadnan transmiti pa sangura specialmente e sangura aedes aegypti y tambe educa e pueblo Arubiano di ki manera nos tur por preveni criadero. Esaki ta cuadra completamente cu e vision di DESPA cual ta “un comunidad saludabel cu sentido di responsabilidad pa su salud”.