Koningin Wilhelmina Kankerfonds cu charla encuanto Cancer na Pecho

Posted on 5/31/2016, 7:22 AM AST | Updated on 6/2/2016, 6:08 PM AST

ORANJESTAD - Den cuadro di 55 aña di existencia di Koningin Wilhelminafonds Aruba, e fundacion ta organisando e prome charla pa e aña cual lo trata e topico di cancer na pecho. Presidente di KWF Aruba Lilly Prince a splica cu durante transcurso di añanan por tuma nota cu e cantidad di pashentnan cu cancer na pecho ta keda aumenta y esaki ta notabel door di e petishonnan cu ta keda drenta pa cuido na cas. Hopi biaha e hendenan tin miedo di tratamento y no ta durf sigui mas cu tratamento unabes nan wordo diagnostica cu cancer na pecho y ora nan busca ayudo ya e cancer ta den un estado avansa. Tin consecuencianan cu ta un poco fastioso y p'esey awor aki atrobe ta pone enfasis riba e parti aki y diasabra, dia 4 di Juni, KWF Aruba ta organisando den Ballroom di Alhambra, un charla.

CONCIENTISA COMUNIDAD

KWF Aruba kier concientisa comunidad en general riba cancer na pecho ya cu tin diferente hende homber tambe cu tin e cancer aki. P'esey mes, KWF Aruba ta extende e invitacion aki na un publico general. E charla ta cuminsa pa 8'or di mainta y lo termina pa 12'or di merdia. E charla lo bay ta na papiamento y e entrada ta completamente gratis.

Tur cu ta interesa por yama na 5820412 pa inscribi, asina por haya un idea di cuanto persona lo por conta riba dje e mainta ey. No lubida, diasabra 4 di juni ta spera cada persona, paso preveni ta miho cu lamenta.

PROGRAMA Y ORADORNAN:

08.00 - 08.25 Inscripcion

08.30 - 08.40 Apertura: K.W.F. ARUBA

08.45 - 09.05 Stichting BOB Aruba: dr. V. Williams, radiologo interventionista

09.10 - 09.30 Mammapoli: sra. Tayrina Arrindell

09.35 - 09.55 COFFEE - BREAK:

10.00 - 10.20 Oedeem Therapeute: sra. Heidi Dijkhoff Lauffer B.Sc

10.25 - 10.45 dr.D.Daryanani, Ciruhano / Oncologo

10.50 - 11.10 dr.R.Jonkhof, Oncologo

11.15 - 11.35 Testimonio: sra. M.Verstappen Wever

11.40 - 11.55 PREGUNTA

12.00 CLAUSURA