Si no logra cu e operador aki tin cu revoca permiso di casino di Occidental

ORANJESTAD - Mientras cu dialuna ainda reunionnan tabata andado pa logra un operador Canades pa e casino di Occidental Hotel, tin indicacion cu si no logra, gobierno lo revoca e permiso. Den combersacion cu minister di labor Paul Croes, el a confirma na NoticiaCla.com dialuna cu 'berdad si no yega na algo, nan lo mester trek e vergunning in'. Si esey sosode sinembargo, e ta e prerogativo y desicion di minister di husticia Arthur Dowers y no Croes. Mediado di gobierno ta reuniendo cu tres partido, esta e operador, sindicato y tambe e doño di hotel, pero nada concreto no a sali afo. Mientrastanto sindicato FTA a manda carta pa minister Dowers pa revoca e permiso di e casino, segun e presidente di sindicato Hubert Dirksz a confirma na NoticiaCla.com. 

INTERVENCION DI MINISTER

"Ami ta haciendo mi esfuerso pa logra un operador, pero si e no logra no por keda alarga e proceso aki mas" Croes a admiti na NoticiaCla.com. E ta mustra cu el a haci un esfuerso tambe den paga e trahadornan e cessantia sin cu e compania a bai bancarota. "Esaki naturalmente cu apoyo di Mediador y SVb". Pa loke ta e deadline cu sindicato a pone pa keda cla, tin un diferencia di opinion. Mientras cu e sindicato (FTA) ta mustra cu e deadline tabata dialuna (30 di mei), e mandatario ta mustra cu e deadline a vence caba. "E 'deadline'  segun mi a pasa caba. Pero FTA tambe a haye prudente pa toch sigui purba haya un operador" Croes a bisa. Mes momento el a mustra cu declaracion cu Barcelo/Occidental mester a paga e trahadornan huridicamente no tin base. "Trahadornan tabatin un contrato cu Aura Casino, no cu e hotel" Croes a bisa finalmente. Negociacion ta wordo hiba cu representante di un grupo Canades