APA: Berdad cu tabatin un incidente pero a trata tur cos segun regla

ORANJESTAD - Mientras cu director di Aruba Ports Authority Jossy Figaroa ta admiti cu tabatin un situacion cu un bapor crucero siman pasa envolviendo un buceador, e ta sigura NoticiaCla.com cu tur cos a bay 'segun regla'. Esaki mientras cu e portal aki tin corespondencia entre departamentonan cu ta cuestiona seriamente kico a sosode. Figaroa a manda un relato breve di loke a sosode oficialmente y ta mustra cu nada straño no a sosode y cu no ta compronde e noticia cu NoticiaCla.com a publica. Mas sigur ta hendenan cu no ta contento con cos ta bayendo, lo a suministra informacion, pero e ta sigura cu nada malo no a pasa. 

SORPRENDI PA NOTICIA

El a mustra cu el a keda sorprendi pa e vespertino Amigoe cu a yama bisa cu a tende cu un buceador lo a muri durante un situacion di siman pasa, pero esey no tabata e caso.  Loke a pasa segun Figaroa, ta cu "diaranson merdia siman pasa, e agencia di e barco crusero cu tabata den waf na Oranjestad na e momento ey ta yama e Hefe Nautico di APA pa inform'e cu e tin entendi cu un di e botonan di salba bida di e barco a cay den awa. Mesora e Hefe Nautico ta informa e Risk Manager di APA y ta pidi'e pa bay e barco pa mira ta kico precisamente a pasa. Conforme e proceduranan e Risk Manager ta informa e Havenmeester kende tambe a dicidi di acudi na e barco. Ta bin resulta cu no ta un boto di salba bida a bay awa pero algo cu ta cubri e boto di salba bida. Mirando cu e obheto cu a bay awa por bira un peligro pa ora e barco crusero sali for di waf y tambe despues pa otro barconan e Risk Manager a dicidi pa laga saca e obheto prome cu e barco sali. A informa e Hefe Nautico di APA cu mester tene cuenta cu ta bay saca e obheto for di awa prome cu e barco sali. E Hefe Nautico a informa Kuststation cu tin algo a sosode na e barco y cu e barco lo no por sali tanten cu no saca un obheto cu a cay den lama. Como cu no por a haya e buceadonan cu normalmente ta yuda APA den situacionan asina a haci un peticion na Polis Maritimo cu mesora tabata despuesto pa duna un man. Promer cu Polis Maritimo a baha den awa conforme procedura nan a informa Kuststation. Den 10 minuut e buceado di Polis Maritimo Polis a logra saca e obheto for di awa y e barco por a sali for di waf sin retraso. E agencia di e barco a informa gerencia di APA cu e capitan di e barco tabata contento con e trabounan a ser haci. A sigui tur e proceduranan y no tabatin ningun hende cu a core peliger. APA ta lamenta cu a sali riba media social noticia no corecto relaciona cu e barco crusero". Te aki e declaracion di e director di Aruba Ports Authority.