Diahuebs gobierno ta reuni cu AHATA pa trata e ley di All-inclusive

ORANJESTAD - Mientras cu e 'guera' ta continua entre gobierno y AHATA riba e topico di all inclusive, gobierno a anuncia dialuna cu diahuebs nan ta poni pa reuni cu AHATA pa trata e ley di All-inclusive. Despues cu siman pasa a sinta cu varios gremionan den nos comunidad, e siman aki reunionnan ta continua pa locual ta trata e ley pa regulacion di All-inclusive cu dentro di poco lo trata den Parlamento.  AHATA tambe a haya su oportunidad pa sinta na mesa cu Minister Oduber pa combersa riba e preocupacionnan cu ta biba cerca nan y con lo por atende cu e preocupacionnan aki, mescos cu a haci cu entre otro Camara di Comercio, ATIA y e organisacion cu ta representa Real Estate nan na Aruba. 

SIMAN PASA

E mandatario ta indica cu a palabra siman pasa cu AHATA cu lo continua cu e reunion diahuebs, unda AHATA di su banda lo haci un inventarisacion riba ley kico ta e puntonan specifico cu ta 'primi e sapato mas duro'. Sr. Oduber ta invita AHATA pa trece preocupacionnan dilanti, porta te hasta alternativa dilanti cu lo por yuda den e proceso. E mandatario ta sigur cu tur hende den comunidad, cu excepcion di e asociacion di hotelnan, a vocifera cu mester regula e fenomeno di All-inclusive.  

COOLING OFF PERIOD

Minister Oduber ta na altura cu AHATA kier un asina yama "cooling off period" pa nan por haya mas tempo pa cierto estudionan wordo haci. Na NoticiaCla.com e mandatario a bisa diadomingo cu e no ta bay duna un cooling off period. Pero awor e ta bisa cu tin posibilidad contal cu AHATA compromete nan mes na un palabracion. "M'a bisa nan cu nos ta habri pa tur alternativa, mirando cu na final bo lo kier yega mas cerca di un consenso y p'esey nos ta na mesa keto bay. Nos a pidi nan pa trece formanan cu nan ta kere lo por atende cu e mesun problematica of crea e mesun solucionnan." Oduber a comparti tambe su opinion riba e asina yama "cooling off period" unda lo bay bek y discuti esaki den Conseho di Minister. "Un di e preguntanan haci riba e "cooling off period" ta si e hotelnan ta dispuesto pa den e periodo aki compromete cu Gobierno di Aruba, cu lo no continua cu proposicionnan of benta di propiedadnan cu ta existi na e momentonan aki cu cadenanan All-inclusive. Durante e reunion AHATA no a acepta esaki y a bisa di no por duna garantia riba esaki."Minister Oduber ta indica cu si ta pidi pa un "cooling off period" mester por indica e motibo pa kico ta pidi pa esaki unda lo por mira si di berdad mester un periodo di tempo. "Unabes cu ta conoci kico ta e puntonan specifico di AHATA su inkietud, kico ta e preocupacionnan y kico ta e alternativanan, a base di esey lo por dicidi uno, si mester un periodo di tempo, y di dos, con largo e "cooling off period" aki lo mester ta. Pero esaki lo mester bay semper si condiciona cu no por continua negociacionnan of benta di propiedadnan cu ta existi na e momentonan aki."