Disculpa di gobierno pero siman a cuminsa 'business as usual'

ORANJESTAD – Gobierno di Aruba a pidi disculpa publicamente na henter comunidad pa e problema di agresion verbal y te hasta fisico cu a tuma luga entre sr. Chris Dammers y sra. Marisol Lopez-Tromp den Parlamento, siman pasa. Interesante ta cu e disculpa no a bin di parti di prome minister Mike Eman, pero di minister Mike de Meza na ocasion di un evento na San Nicolas. Pa aworaki, e hecho cu a bisa algo, 'ta algo'. Segun e mandatario, nan a discuti e situacion internamente “Nos kier pidi nos disculpa pa locual a pasa den Parlamento” e mandatario a sigui bisa. Segun e mandatario “no tin espacio pa niun sorto di agresion verbal, fisicamente, mentalmente...e no ta corecto!” e mandatario a declara na prensa durante un evento dialuna mainta na San Nicolas. 

BUSINESS AS USSUAL

Fuera di esey, e siman den gobierno y parlamento a habri manera 'business as usual'. Un delegacion di parlamento a biaha pa Hulanda pa atende reunionan di IPKO, y e resto di parlamento a atende un ceremonia cu ta anuncia un proyecto ambicioso pa San Nicolas. Un minister y gremio hotelero ta continua cu nan guera frontal. Y den tur esaki, mientras cu tin pregunta riba kico a sosode entre dos cabesante di parlamento siman pasa, un minister ta anuncia dialuna sin mas cu 'tin un union den e gobierno'. 

PREGUNTA DI SIMAN 

E pregunta di siman (y fin di siman) di ki consecuencia e acto bergonsoso di un siman pasa lo tin, ta parce di mester traha lugar pa 'business as usual'. un reunion cu no a laga mucho claridad a purba trece e unico claridad cu 'a papia' cu e protagonistanan. Mester simplemente kere e loke cu mandatarionan a bisa, y spera cu cos 'lo drecha'. Mientrastanto, cos ta sigui 'normal', unda cu parlamentarionan (incluyendo e vice presidente) a sigui cu su trabou normal na Aruba, mescos cu e ta e caso di e presidente di parlamento Marisol Lopez Tromp, pero na Hulanda na reunion di IPKO.