Arthur a bira e prome horcan di e temporada

MIAMI/ ORANJESTAD – E prome horcan pa e temporada aki den laman Atlantico ta conoci, y yama Arthur. Arthur ta net un tiki oost de e costa di florida y moviendo cu velocidad di 6 nudo direccion noord-oost y cu biento maximo di 60 nudo. ta wordo anticipa cu e sistema aki ta sigui e costa parti oost di Merca. Mientras cu e tabata crece den intensidad, e no ta un menasa pa nos isla(nan).

Oficialmente 1 di juni 2014, e temporada di horcan a inicia y aunke Aruba no ta directamente den e faha, tin motibo pa precaucion. Si aña pasa e cantidad di tormenta y of horcan tabata poco, e aña aki e cantidad ta mas chikito ainda. E ultimo pronostico conoci, tabata dia 10 di april ultimo ora cu e conocidonan Phillip Klotzbach y William Gray di Colorado State University a pronostica un temporada cu poco actividad di horcan. Den nan pronostico annual di temporada, e ekipo menciona a pronostica un total di ‘apenas’ 9 tormenta cu nomber, di cual 3 lo por bira horcan y uno un horcan serio (categoria 3 of mas) den e zona atlantico. E pronostico ta hopi mas abou cu un temporada averahe di 12 tormenta cu nomber, 6 horcan y 3 horcan serio. Problema cu e noticia aki ta cu hende ta asumi mesora cu e hecho cu tin poco tormenta pronostica, cu e peliger ta bira menos. Esaki ta nada menos cu berdad pasobra e berdad ta cu por bien ta cu tin menos horcan. “Pero ta un horcan ta suficiente pa haci e destruccion necesario cu ta laga un isla of sitio destrosa pa añanan largo”. Pues segun Gray, e cantidad di horcan of tormenta ta relativo, compara cu e daño cu uno por haci.

Por corda tormentonan manera David y Katrina, cu a bira horcannan feroz cu a causa masha hopi daño. Pa Corsou, tabata Thomas, cu a haci suficiente daño cu a laga partinan di Corsou y su habitantenan terorisa pa varios luna. Y Aruba ta corda e rabo di Ivan cu a haci e daño cu ainda nos no por lubida. Pa St Maarten esey tabata Luis na 1995. Mientras cu e temporada ta cuminsa otro siman, e realidad ta cu banda di luna di augustus, cu e seriedad di e temporada ta cuminsa conta. Prome cu esey, ta conoci cu no tin dje hopi actividad sino na luna di augustus. Entre augustus y september, por conta cu e peak di e temporada ta vigente y cu ta eynan e dañonan mas grandi por ta. Den caso di Thomas, esaki a sosode casi na final di e temporada, ora cu comienso di november, Corsou a conoce su horcan Thomas.

Aruba ta prepara su mes mas cu ta posibel, aunke cu realidad ta cu dado momento e isla por ta bou di awa pa un periodo. Ta conoci cu antes cu un simple yobida, Aruba tabata inunda pero cu cambionan haci na e.o. e sistema di riolering, esey no ta dje dramatico mas. Sinembargo ta conoci, cu mescos cu otro partinan cu ta mas grandi cu Aruba, lo tin momentonan cu e awa lo acumula di tal forma cu lo por tin inundacionnan temporal, te ora cu e awa haya su caminda pa bay. Den curso di simannan nos dilanti lo tin mas informacion mas concreto di e cantidad exacto di tormenta cu nomber.