All Inclusive: AHATA y minister ta keda para fuerte riba nan punto

ORANJESTAD - Mientras cu partidonan a para e bay bin di aviso den medionan di comunicacion, cu e intencion pa por yega na un 'paz', e siman ta habri cu partidonan mes (of mas) leu di otro. Un lista di peticion di AHATA na e minister di turismo Otmar Oduber, no a haya un oido positivo, y for di e comentario ambos partido ta decidido pa bringa e 'guera' aki te na final. Cualkier 'indicacion' cu partidonan a 'fria cabes', awe ta simplemente un ilusion. Esaki a compronde di ambos partido den fin di siman. 

CARTA DI AHATA PA GOBIERNO

Den fin di siman AHATA (Aruba Hotel and Tourism Association) a manda un carta pa Gobierno bisando cu nan 'ta extremadamente preocupa pa e consecuencianan negativo den caso cu aproba e proposicion di cambio di ley pa revoca e permisonan di operacion di hotel existente y reemplasa nan cu e permisonan nobo cu ta contene restriccionnan”, asina e organisacion a skirbi den un carta pa Gobierno. 

COMPROMETI PA BRINGA LEGISLACION

“Nos ta totalmente comprometi pa bringa e legislacion aki. Den caso cu aprob’e, sin duda lo afecta negativamente e forma con negoshinan ta mira futuro inversionnan den Aruba. Esaki, na su turno, lo por afecta den forma negativo futuro empleo pa trahadornan, lo afecta calidad di e producto y lo afecta e negoshinan cu ta depende di e exito di nos turismo, tanto directamente como indirectamente”, asina e organisacion a skirbi den su carta.

RETIRA E LEGISLACION

Mas leu AHATA ta kere cu e asunto aki ta asina importante y ta den e miho interes di Aruba, cu nos ta pidi pa retira e legislacion proponi, como cu Gobierno no por a demostra ningun motibo convincente pakico un ley asina drastico ta necesario.

COOLING OFF PERIOD

AHATA ta pidi awor un “cooling of period” pa por permiti un estudio extensivo y independiente pa salvaguardia e futuro di turismo di Aruba, di cual 90% di nos economia y 48.000 empleado ta depende di dje.

REACCION DI MINISTER ODUBER

E mandatario di turismo mesora a reacciona riba tur e puntonan cu AHATA a menciona. Riba e parti di peticion pa retira e legislacion, e mandatario tabata hopi cla. "(mi) no ta mira niun mitibo pa retira e legislacion, y ta spera e keda aproba mas pronto cu ta posibel, mirando cu tin varios negociacionnan andando entre hotelnan existente y cadenanan All Inn" e mandatario a bisa. Riba e cooling off period tambe e mandatario a reacciona. "No ta mira un necesidad pa cooling off period, paso ainda AHATA no a identifica oficialmente e puntonan di preocupacion ni alternativanan. Nan a keda di entrega esakinan e siman aki". Riba e parti di estudio extra cu AHATA a pidi, tambe Oduber tabata hopi cla. "Gobierno a haci estudionan extensivo y completo tanto localmente como tambe cu informacionnan internacional, durante e ultimo añanan. AHATA no a tuma e cos aki na serio y nunca a haci un estudio. Siendo cu esaki ta un topico serio pa mas di un aña caba. Mas ainda, considerando e gran cantidad di cartanan ricibi for di tur sector den nos economia y comercio sosteniendo e reglamentacion aki" Oduber a finalisa bisando. Pues por nota cu e asunto aki por lo pronto lo no haya un descanso, y cada partido ta determina pa bringa esaki te na final.