Fantasia a rebeldia den Soul Beach y Claudius a saca cara di Aruba

ORANJESTAD - E fin di siman aki un total di riba 3000 turista Mericano a disfruta di e di 16 edicion di Soul Beach Music Festival, cu a culmina diadomingo cu e concierto final. E eventonan principal a inicia diabierna cu e Comedy Night na Renaissance Festival Area, sigui pa dos anochi di musica, pero e biaha aki na Harbour Arena, e tereno riba waf cu ta wordo uza pa concierto ultimo tempo. Na tur, Aruba por mira bek riba un fin di siman exitoso unda cu miles di turista por a disfruta di nos isla y probecha di e dianan liber relaciona cu e 'memorial day' na Merca (dialuna 30 di mei). 

E ANOCHINAN 

Pa loke ta e anochi di comediante (diabierna), a nota cu mas hende cu antes tabata presente y cu casi no tabatin lugar pa pone hende. Pa algo mas di dos ora, e dos comediantenan Afion Crockett y Tony Rock a deleita esnan presente. Diasabra e prome anochi di musica a keda inaugura cu nos orguyo local Claudius Phillips y Oreo, reforsa cu artista invita di Corsou, Reinier Lijfrock. Phillips a presenta net algo despues di 7'or pa originalmente 20 minuut pero a toca finalmente 30 minuut. Mientras cu e publico a gosa inmensamente di su presentacion, e keho tabata e rato 'cortico' cu a duna e banda pa toca. Den un reaccion cortico pa NoticiaCla.com, Philips a bisa "Un experiencia cu mester a dura mas!", confirmando cu artistanan local mester haya e chens regular pa por presenta dilanti un audiencia internacional asina. Esey no a kita afo cu e loke a keda presenta pa e artista local y su banda, tabata bon. Un mix di cancionnan di pasado den un bachi di zouk y soca a keda masha gusta mes. NoticiaCla.com a compronde te hasta cu un grupo di Boston a keda asina interesa den su presentacion cu a invit'e pa Boston pa un presentacion eynan. Nan a gusta e forma con a mix 'old school (canticanan bieu) cu e genero ey di musica (zouk y soca).

FANTASIA

E cantante cu a haya su fama despues di a gana den e programa di talento American Idol, a inicia su presentacion den un forma grandi, pero no satisfecho con e escenario y e parti di publico tabata comparti. "Mi kier pa boso kita e bareranan aki mi dilanti!" Fantasia a bisa na varios ocasion. "Pa ora cu mi prome cancion caba, e bareranan (hekinan) aki dilanti mester ta kita!". Mirando cu ora cu esaki no a sosode na final di su prome cancion, Fantasia a pone tur hende di e organisacion core, ora cu el a baha di e scenario, y ubica su mes den forma spontaneo den e parti di VIP, unda cu for di eynan e por tabatin un bista y asercamento mas cu su publico. E publico a bira loco ora cu el a haci esey y a cuminsa canta y biba cu ne pa resto di e concierto. Esaki ta demonstra un biaha mas cu artistanan mas y mas ta desaproba di e forma con ta set up e particion di e tereno, y kier pa e publico ta mas y mas cerca di nan. Aña pasa durante e Summerfest, Pitbull tambe a haci mescos y exigi pa kita e stulnan di VIP dilanti y pone publica mas cerca di e tarima. 

ISLEY BROTHERS

Na final di anochi, the Isley Brothers a presenta riba scenario y a deleita nan publico cu e musica di nan genero, unda cu nan a sa di presenta un exito of mas den cada un di e ultimo 5 decada musical. Un tras di otro, sin para, nan tabata presenta nan exitonan y tur a keda aprecia pa e publico cu a bishita e arena. 

DIADOMINGO Diadomingo anochi e festival tin como artistanan local Buleria, y internacional Miguel, y Jazmine Sullivan.