Por poco salida di bapor crucero a resulta den morto di buceador

ORANJESTAD - Por poco un accidente a tuma lugar na waf di Aruba na Oranjestad cu por a laga un buceador (di polis) morto. Documentonan y corespondencia cu NoticiaCla.com a pone man ariba, ta mustra cu siman pasa pa falta di comunicacion por poco durante salida di un bapor crucero for di Aruba, esaki lo a pasa riba un buceador cu tabata haci su trabou bou di awa, banda di e bapor. Si no tabata pa un colaborador abordo di e bapor crucero Pacific Princess cu diripiente a wak e situacion peligroso y bati alarma, e situacion lo por tabata uno desastroso pa e buceador, y cu ne un problema internacional pa Aruba. 

E INCIDENTE

Segun e informacion acumula den documentonan obteni pa NoticiaCla.com, e incidente a pasa siman pasa diaranson (25 di mei) momento cu e bapor crucero Pacific Princess tabata preparando pa sali. Dado momento a pidi e instancia cu mester autorisa e peticion, pa un buceador drenta awa bou di e bapor pa 'busca algo'. A nenga esaki mirando cu e piloto di e tugboat tabata abordo caba di e crucero pa prepara pa asisti cu e salida. 

COMUNICACION ROBES

For di documentonan obteni, por nota cu algo a bay robes entre kuststation y havenmeester, unda cu uno (kuststation) lo a para e peticion y e otro (havenmeester) lo a duna ok toch pa e buceador drenta awa y haci su trabou di buskeda. A compronde cu e buceador a drenta awa sin cu lo tabatin e regla di seguridad sigui (boei reglamentario etc), y cu si no tabata pa e persona alerta riba e bapor cos lo a bay hopi robes. E persona alerto a bin nota cu tabatin e trabou andando cu un boto cu e buceador bou di awa mientras cu tur cos tabata cla pa e bapor sali. Si e bapor crucero a sali sin mas segun su ora regular, esaki por a resulta den posibel morto di e buceador, segun autoridad di waf a keda informa. Debi na e incidente aki, e bapor a sali cu un retraso (cu tambe ta wordo disputa den e serie di corespondencia). Un sin fin di carta y corespondencia a keda intercambia (NoticiaCla.com tin esaki tambe) despues cu a resulta den reunionnan pa atende e problema serio di comunicacion aki. E problema (manera cu NoticiaCla.com a compronde), ta cu den e serie di corespondencia, por nota cu tin un diferencia den opinion entre esnan responsabel, di con a atende cu e situacion pa evita cu e lo sosode atrobe. 

MAS PROBLEMA NA APA

Esaki ta e ultimo di un serie di problema cu Aruba Ports Authority lo ta pasando aden. Informacion cu NoticiaCla.com a ricibi ta varios. For di keho di trahadonan cu tin coverup formal tumando lugar den e compania, y tambe cu pa motibo di empleo di famia y amigo, ta dificil pa coregi e situacion. Otro situacion ta di e tugboat Andicuri cu mester a bay drecha na Colombia. Ora cu e tugboat a bolbe Aruba, e lo a bolbe sin chapaleta ya cu esaki lo a keda 'bendi' na Colombia. A compronde cu e tugboat lo bay wordo geleased den futuro, sin destaho publico. Y pa loke ta e chapaleta tanto busca, e lo ta na Colombia y nunca a yega Aruba. Informacion no confirma ta bisa cu el a wordo bendi na Colombia, aunke cu NoticiaCla.com no por a confirma esaki. Y finalmente riba e tugboat, cu esun cu nan a cumpra for di Hulanda cu lo a bay sin un destaho publico sino mas bien un compra cu hopi a haya dudoso. Tambe tin asunto cu famia di persona den directiva lo a haya accidente cu auto di trabou, y sin mas a haya un otro auto pa sigui core. Tambe cu miembronan di hunta di comisario lo ta wordo paga pa keda keto, pa medio di carchi di concierto ora cu tin concierto riba Harbour Arena. Pues for di paden, tin un sin fin di informacion cu ta saliendo riba operacion na Aruba Ports Authority, cu lo no ta corecto. Un sin fin di critica cu a sali diripiente for di seno laboral di APA, mustrando e situacion segun nan cu ta pasando den e compania. Ta pendiente e reaccion di gerencia di APA y gobierno. Foto cortesia curtandcindyworld2015.blogspot.com