Criminalidad na Aruba ta preocupa liñanan di bapor crucero Mericano

MIAMI - Criminalidad riba Aruba ta preocupa liñanan di bapor crucero Mericano. Esey ta e mensahe cu minister Otmar Oduber di turismo a haya durante su bishita recien na Miami. Segun e mandatario a divulga ademas pa medio di un comunicado, 'e tendencia di criminalidad creciente ta keda un punto di preocupacion specialmente mirando su efecto negativo riba turismo'. Mes momento sinembargo e mandatario ta bisa cu "cuerpo policial, specialmente den e areanan turistico den nos centro di ciudad, pues nos waf y downtown area, ta haci un bon trabou'. No obstante esaki sinembargo, e cruceronan ta keda preocupa. 

PRECUPACION DI VARIOS AÑA

Loke ta resalta tambe ta cu no ta awor, sino for di e ultimo 2 pa 3 aña y sigur durante su ultimo bishita siman pasa na oficina principal di Royal Caribbean Cruise lines y tambe Carnival Cruise lines, cu ta e liñanan cu ta trece mas tanto pasahero Aruba, ta bin dilanti e preocupacion pa futuro mirando e tendencia negativo cu criminalidad riba nos isla ta aumentando Oduber a bisa. "Mas y mas e bishitantenan ta keha riba e incidentenan cu ta tuma luga demostrando un aumento den criminalidad". 

POLIS TRAHANDO BON

Mientras cu di un banda ta papia di aumento di criminalidad, e trabou di polis a haya elogio cerca Oduber. Segun e mandatario, e ta mira cu e unidadnan aki ta purba percura cu actividadnan na waf ta bou di control cu tin dia tin entre 3 pa 4 mil turista y otro dianan ta yega te 9 pa 10 mil hende. Tambe e mandatario a elogia e trabounan cu ta wordo haci pa e aspecto di trafico na e momentonan peek cu un cantidad grandi di barconan na nos waf. Obviamente sinembargo esaki no ta suficiente si mira cu for di e liñanan crucero e preocupacion t'ey y a mustra esaki cu estadisticanan unda mas y mas kehonan ta drentando."Locual mas ta resalta ta turistanan cu ta wordo horta riba beachnan".

ARUBA KIER MIRA UN RAPPORT DETAYA  

Oduber a pidi e liñanan pa un rapport detaya cu e areanan specifico, pa asina por tuma accion. "Kisas a traves di Aruba Hotel and Security Foundacion y den colaboracion cu Cuerpo Policial lo por mira si por brinda mas sosten den e areanan aki." e mandatario ta comenta. "E ta un punto di preocupacion y nos sa tambe cu e liñanan Crucero ta tuma e observacionnan di nan pasaheronan hopi na serio, na momento di fiha nan destinacionnan na momento di planifica e iterinario di nan barconan." Interesante ta e hecho cu recientemente ATA a colabora cu AHSF cu un suma di 750 mil florin pa percura pa controla netamente e aspecto aki. Di parti oficina di turismo nan ta habri pa sigui duna un man si esaki ta necesario. "Mester pone atencion na esaki pa evita cu e ta sigui escala cu Aruba por haya su nomber atacha cu tur e consecuencianan negativo pa nos Turismo." Oduber a bisa finalmente.