Ruiz: Gerick Croes ta exigi rectificacion y pago di 52 mil florin di mep

ORANJESTAD - “Sr. Gerick Croes a cuminsa un caso di rectificacion y avanse riba daño y perhuicio di 52 mil florin contra MEP, y e caso a wordo trata awe”, segun abogado Anthony Ruiz a duna di conoce awe. “MEP ta haya hopi lamentabel cu e  caso aki a tuma lugar pasobra no tabata necesario. E acusacion di Gerick Croes ta cu MEP lo a difama Gerick y daña su nomber riba sucedidonan cu a pasa, y esey nos a mustra claramente cu no ta e caso y nos por a prueba cu mi cliente no tin arte ni parte den esaki. Y mi mester bisa, cu Gerick na ningun manera no a prueba contrario. Te awe ningun hende tabata conoce contenido di e documentonan cu a wordo uza den e caso aki pasobra MEP no a publica nan, pero awe tur documento cu a wordo uza den corte ta bira publico cu e caso aki y tur hende por haya sa kico a pasa realmente”. Cual documento esakinan ta e abogado no kier a bai den detaye.

MALVERSACION OF NO

Riba e pregunta cu si ta trata di un caso di malversacion cu Gerick Croes lo a comete, ya cu esaki a bira publico den Corte awe, e abogado a duna di conoce cu e no ta bai confirma nada, e ta laga esaki pa politiconan y cliente. “Un cos mi por bisa cu durante tratamento di e caso hues a bisa cu por ta den interes di ambos partido pa nan papia cu otro pa bin un conferencia di prensa of press release cu conhunto, y a duna nos te cu 10 di juni pa yega na esey y si partidonan no yega na otro, dia 17 di juni lo duna sentencia”.

LEAK INFORMACION OF NO

Ta keda e asunto di prueba di a leak informacion of no. Aki e abogado a bisa: “No, ningun momento, esey ta e penoso den full e caso aki. Pasobra a wordo bisa cu MEP a uza cierto palabranan manera “fraude” of duna press release na 24 ora, pero ningun di e puntonan ey por a wordo comproba awe, ningun, niente, zero" e abogado a sigui bisa. P'esey e abogado ta lamenta cu e caso aki a wordo entama pasobra MEP a tene su mes na su palabra di no bay den publicidad. "Pero lamentablemente Gerick Croes si a bay den publicidad awe cu e caso aki den corte, siendo cu e intencion tabata cu e caso aki lo keda entre partidonan, pero awor e mes ta trece den publicidad bek. Mi tin un bon feeling despues di e caso aki, mi tin confianza cu tur e pruebanan cu mi a trece dilanti y tur nan ponencianan cu nos a desbarata nan y mustra lo contrario cu MEP no tin arte ni parte den difamacion y cu MEP no a acusa Gerick di nada falsamente”, e abogado a bisa finalmente.