Grupo specialisa K9 a recauda fondo pa radiothon “Musica pa Educacion”

ORANJESTAD - E combinacion di e club di cacho ‘Dogs and More’ y unidad di cacho di husticia a colecta 1.700 florin pa e radiothon ”Musica pa Educacion” diabierna anochi. Como aporte na e evento, e grupo menciona a tene un demonstracion pa esnan presente, cu a hala hopi atencion. E forma con a colecta e placa, tabata e asina yama ‘icewater challenge’ cu a tuma lugar pa mas di un luna. E intencion tabata pa cada persona reta un otro pa sea paga 100 florin of scapa cu apenas 10 florin door di laga nan basha awa cu ice riba su cabes. Mientras cu a entrega e suma bunita, a opta pa continua cu e challenge pa algun dia mas. Aworaki e recaudacion ta bay pa “Fundacion pa nos Comunidad”. Riba e combinacion di potret por haya un impresion di e capacidad di e cachonan specialisa cu nan manehadornan.