Gerick Croes a hiba partido MEP corte pa drecha su nomber

ORANJESTAD - Ex miembro di partido MEP Gerick Croes a hiba partido MEP awe corte pa bringa e acusacion contra di dje di fraude of malversacion. Croes a confirma den un comunicado cu e caso a wordo trata diabierna mainta y e sentencia ta dia 17 di juni proximo. Mes momento tambe a splica cu hues a duna oportunidad na partidonan pa yega na un areglo mutuo. "E unico cos cu mi kier ta mi derecho, dus mi bon nomber bek."

RUMOR INFUNDA

Segun Croes, den ultimo simannan a sali yen publicacion y rumornan ta core rond relaciona cu Gerick Croes lo malversa of fraude. "Mi persona kier desmenti categoricamente tur acusacion infunda y sin base haci contra mi persona. E publicacionan aki ta perhudica'mi como profesional hbo-er pa haya un trabou y ta p'esey mes mi a cana e caminda legal pa limpia mi nomber" Croes a sigui bisa.

CORTE

Pa por limpia su nomber, Croes a splica cu el a bai corte hunto cu su abogado Richie Kock pa un caso cu el a entama contra di partido MEP. "Motibo tawata cu mi kier haci mi nomber limpi. Y p'esey mes mi a scoge e caminda cu mi tin derecho riba dje. Den mi caso sumario mi a enfatisa mi inocencia den e caso aki. Hues a scucha tur dos banda y e sentencia a wordo poni pa 17 juni benidero" . Hues a duna oportunidad pa e partidonan yega na un areglo mutuo y esey ta e status di e caso na e momento aki."  "E unico cos cu ami kier ta mi derecho, dus mi bon nomber bek" Croes a reitera.