Herde: Lopez-Tromp y Dammers mester evalua y saca nan conclusion

ORANJESTAD - "Desapunto, desaprobacion. No por tin otro palabra pa describi (e situacion cu a surgi ora cu dos parlamentario a haya nan mes den un bululu)" ta e forma con lider di fraccion di AVP Rene Herde a expresa su mes na NoticiaCla.com for di Hulanda awe mainta. Mientras cu su reemplasante Desiree de Sousa a papia na nomber di fraccion caba, Herde a mas bien extende e informacion y añadi mas na esaki. "Hende grandi, y sigur den posicion importante manera presidente y vice presidente di parlamento no por laga diferencianan di opinion, cualkier cu sea, conduci na e comportacion aki" Herde a sigui añadi. 

LES SERIO PA TUR HENDE

Herde ta spera cu e loke a sosode, ta un les serio pa tur hende. "Pa nos, pero pa tur hende cu ora cu bo tin un responsabilidad, bo no por hunga cu ne, cu e forma cu esaki a sosode". Un di e 'dilemanan' cu tin aworaki, ta cu mirando cu ta prome biaha esaki a sosode den e forma aki, no ta mucho conoci kico por y lo mester haci den e caso aki. Ta referi aki na e instrumentonan cu por uza pa 'remedia' e situacion aki. A puntra Herde si ta papia di ki forma di 'castigo' tin den un caso asina pa mustra comunidad cu esaki no por sosode atrobe. Segun Herde, pa cuminsa e dos personanan aki tin cu asumi nan responsabilidad, pero e no a bisa kico e responsabilidad ey mester ta. Mirando e funcion halto cu e dos personanan aki ta carga, Herde ta kere cu nan mester sa kico por y kico no. "Mi ta prefera pa nan mes evalua kico a sosode y saca conclusionan serio pa loke a sosode" Herde a bisa.

NO TIN REGLAMENTO PA UN SITUACION ASINA

E reglamento di orden di parlamento no tin ningun prescripcion, segun Herde. "Den partido (AVP) nunca esaki a yega di sosode. Nos partido como tal no tin un regla cla. Pero mi por sigura bo cu den partido nos ta tuma esaki sumamente na serio". Herde a bisa cu probablemente ya nan (e dos personanan envolvi), a haya e encargo pa nan mes evalua loke nan a haci. Na di dos lugar, e fraccion lo tuma e iniciativa pa busca moda pa un solucion y saca conclusion serio. "Pasobra e no ta acceptabel" Herde a sigui reitera. Y despues e partido lo yega na e punto di tuma un desicion.  

FRACCION TA CONCIENTE DI LOKE A PASA

E hecho cu mayoria di e fraccion no ta papiando publicamente riba e tema, no ta nifica cu nan no tin nan comentario. Herde a sigura e portal aki cu internamente ta papiando y analisando. Pues e percepcion di cu tur a cera boca y ta hungando papel di ciego, sordo y mudo no ta corecto. De hecho ta un solo persona ta esun cu a mira tur cos cu ta Jeffrey Kelly cu a mira tur cos y a dicidi inicialmente pa laga e dos personanan en cuestion resolve e asunto. Di otro banda, Herde no ta kere cu e miembronan lo keda keto y haci manera cu nada no a pasa. "Esey no por!" Herde a bisa. E tin contacto cu su coleganan y a wordo informa cu nan a opta pa no bay den publico pa evita confrontacion. Herde a lamenta si e comentario di oposicion cu a comenta riba e suceso, sin cu nan tabata presente. "Si nan tabata presente nan mester a duna declaracion. Pero si bo no tabata presente, bo no por bay papia riba e asunto y scohe partido. Bo mester abstene di haci esey". Herde ta admiti cu e loke a sosode ta algo inaceptabel, pero e no ta algo cu bo ta haci politica cu ne.