KvK: Partidonan responsabel mester sinta resolve asunto di all inclusive

ORANJESTAD - A base di e feedback haya di diferente area, Camara di Comercio a constata cu e concepto di all-inclusive probablemente den e locual tin, no ta esun cu mas lo rinde pa e economia di Aruba. Esaki ta e reaccion mas recien di e gremio comercial diahuebs riba e tema cu a bira uno controversial. Su presidente Daphne Cesario Lejuez a reitera cu nan como gremio no ta contra all inclusive, sino e expansion di mas all inclusive cu ta limita e guestnan pa bin 'pafo'. "Pa nos no ta si nos ta pro of contra e ley, pasobra nos ta kere cu e parti ey ta keda na e industria mes pa comunica cu minister over di esaki" Lejuez a reitera. "Afterall nan ta inverti den e industria y tin añas meti den e industria". Camara ta kere si cu ta importante pa e partnernan sinta hunto pa yega na un acuerdo.

PARA PA INTERES GENERAL

"Nos ta para pa e interes general y locual ta positivo pa economia di Aruba" Lejuez a sigui bisa. "Si encaso presenta cu all inclusive no ta esey, obviamente e no tin nos sosten". Ademas Lejuez ta mustra cu e minister encarga  (Otmar Oduber) no ta contra all inclusive, sino un expansion descontrola. Eynan nos tin cu bay wak kico e ta y kico e middenweg ta". 

RAPPORT PRICE WATERHOUSE COOPERS

E rapport di Price Waterhouse Coopers enberdad ta existi y a wordo parti pa e.o. KVK, pero e no ta contene cifra ainda riba e impacto riba e economia local. "Esey ta haci'e hopi dificil pa por forma un opinion basa riba hechos y datos, kico e efecto ta. Di otro banda e argumento ta cu hopi ta e hotelnan cu na punta di benta y esey ta pone cu tin un urgencia pa pasa e ley. Esey nos ta compronde", Lejuez a bisa. "Nos ta wak e desaroyo positivo pa nos economia local. Mi no ta bay bisa cu nos ta contra, nos ta pro. Nos ta pro e desaroyo balansa di nos economia local" Lejuez a finalisa bisando.

PRECUPACION INICIAL DI KVK

Tabata algun siman pasa cu e gremio a sali afo mustrando su preocupacion pa cu e ley aki, y a cuestiona e forma con esaki tabata wordo presenta. E reaccion aki a causa un contra reaccion di minister di turismo cu a interpreta e comentario di KVK como un cambio radical di pensamento di un aña pasa ora cu nan tabata 'sostene' e paro di all inclusive. A te hasta mustra cu ta flip flop cu e idea. Camara di Comercio a reacciona e ora ey cu nan no ta considera esey como un flip flop, sino mas bien a haya mas informacion y basa riba e informacion extra, a formula nan pensamento awor. Na final, partidonan (minister di turismo y camara di comercio) a sinta hunto pa elimina cualkier mal comprendemento riba e tema.