Camara di Comercio preocupa pa situacion malo den caya grandi

ORANJESTAD - E situacion den caya grandi na Playa ta wordo considera como un problema pa Camara di Comercio. Su presidente Daphne Cesareo Lejuez a mustra cu nan no ta hayando informacion di e.o. Aruparking pa por evalua e situacion real pa medio di cifra y cu lamentablemente nan no a tende mas di e compania aki. "Nos a pidi diferente biaha pa rapport, y ta wardando riba esaki" Lejuez a bisa. Ademas e ta mustra un berdad segun e gremio, cu caya grandi ta 'desola'. "Tin hopi negoshi cu a y ta cerando (nan porta), y ta bogando pa un solucion". A mustra cu den un periodo por lo menos 30 tienda den caya grandi a cera su porta. Mes momento a bisa cu no ta husto pa culpa solamente Aruparking, pasobra tabatin un slow down tambe den economia. " Locual ya caba tabata down, b'a caba remat'e". 

SOLUCION PA E PROBLEMA 

Segun e presidente, a combersa cu tur e stakeholdernan pa bin cu solucionnan concreto pa resolve pues e problema. A bin cu entre otro free parking pa un temporada, pero cu a resulta despues cu ta gobierno mes a paga p'e. Despues e intento a para. Kier a haya cifras pa wak con e presupuesto ta hinca den otro pa asina tin un idea unda pa soluciona e problema. "Ta dificil pa haci tur weekend liber of cambia tal ora. Pero e ta dificil si no sa con nan (Aruparking) business model ta funciona". A mustra cu e intencion ta pa riba termino cortico, papia atrobe cu e stakeholdernan pa un miho solucion. 

CRITICA RIBA SONDEO HACI

E critica riba un sondeo haci un tempo atras pa un grupo di comerciante y e gremio, tawata e tempo ey bisando cu e no ta indicativo di e situacion mirando cu ta apenas un 60 y pico tienda di riba 200 a participa. Camara di Comercio ta disputa esey mustrando cu e cifra di trahado encuesta ta riba mil y si no ta tur, un gran mayoria ta di e grupo di persona cu ta gana salario minimo. "E ta acapara bastante persona cu ta depende di e parkeo pa nan traha" Lejuez a bisa. 

CAYA GRANDI MORTO

Dunando un ehempel bibo di e situacion malo, Lejuez a referi na e orario di 3'or di atardi riba un dia, por saca un potret cu e caya ta practicamente morto. "Wak e caya riba su mes. E fluho di hende cu antes tabatin. Ora cu e caya tabata habri, semper tabatin movecion. Caya semper tabata pa local. E nunca no tabata un trekpleister turistico. E tabata semper un movicion local, algo cu casi no tin mas. E idea cu partido MEP a anuncia recientemente di habri caya grandi atrobe pa auto, segun Lejuez, no ta un idea nobo. "Prome cu MEP a bin cu ne, mi mes a menciona esey" Lejuez a bisa. Door di habri e caya bek, ta genera mas trafico. Hendenan cu antes tabata core haci window shopping cu auto, ta bin bek su manece porta cumpra algo. Awe si ta solamente algo specifico cu bo tin cu haci, bo lo bin, sino no.