Prome Minister Eman lo resolve 'e bululu' interamente prome cu sali pafo

ORANJESTAD - Prome Minister Mike Eman a opta pa resolve e problema di e dos miembronan di partido esta Marisol Lopez Tromp y Chris Dammers internamente prome, prome cu e sali bay pafo cu informacion. Asina lider di fraccion di e partido berde Rene Herde a bisa NoticiaCla.com. E pregunta tabata a rais di e pensamento cu ainda e lider di partido y actual Prome Minister mes no a bin dilanti pa reacciona riba e loke a sosode. "Mi tin contacto cu ne, claramente. Ariba esaki tambe. Nos a palabra cu ta haci tur cos interno prome, pasobra ta dos miembro di nos partido" Herde a bisa. Esaki ta pa evita cu e ta bira un confrontacion mas grandi. "Nunca bo kier ningun problema, ningun caminda. Bo kier resolve den e forma menos daño por haci na cualkier persona". 

CONCIENTE CU TA ALGO PUBLICO

No obstante esey, nan ta conciente cu e ta algo publico den funcion, y e resultado lo sali publicamente tambe. Pues, Prome Minister a opta pa resolve esaki internamente prome."Semper bo ta haci'e internamente prome. Bo ta purba. Bo ta spera cu e hendenan (Lopez y Dammers) reconoce loke a pasa, reconcilia manera hende grandi. Si no ta esey, nan mes lo evalua nan comportacion. Nan lo ta haciendo esey. E ta un eror serio. Tin iniciativanan serio tumando lugar caba den partido pa wak pa soluciona esaki. No pa tap'e. E ta algo cu a sosode publicamente. Pero si pa saca conclusion y les di con nos ta no solamente preveni esaki di sosode, pero pa wak con nos ta sigui wak dilanti."