Minister Schwengle: Arthur Dowers ta candidato perfecto pa director hospital

ORANJESTAD – Actual minister di husticia Arthur Dowers ta un candidato perfecto pa bira director di hospital. Por lo menos segun colega minister Alex Schwengle den un declaracion na e vespertino Amigoe. Den un relato riba e situacion actual riba maneho di hospital y unda esaki ta para, Schwengle ta haya e pregunta di con a para cu Dowers como candidato. Un posibilidad cu for di comienso di aña ta coriendo y cu e propio minister di husticia no a nenga di ta interesa aden. Pa loke ta e pensamento di Schwengle riba e candidatura di su colega, e la sigura cu ‘riba papel mi colega Arthur Dowers ta un cumpli cu tur rekisito”. E mandatario di salud ta kere cu Dowers lo por haci un bon trabou. “Pero e tin un otro funcion aworaki, y mi no sa si e ta habri pa un otro reto” Schwengle ta sigui bisa den e articulo. Riba e busqueda pa un director, -los di e posibilidad di tin Dowers como un candidato-, Schwengle ta bisa cu esey ta tarea di e hunta di supervision nobo di hospital. Mes momento e titular di salud ta sigura cu contrario na desisionnan anterior, e hospital lo conta cu solamente un director enves di 3. Si, e director lo conta cu dos gerente cu lo asesor ‘e den su labornan.