Van Veen: 'A benta tur mi pertenencianan afo y a mata mi cachonan inhustamente'

ORANJESTAD - Dos siman despues cu polis a deten'e Gilbert van Veen pa negligencia (di su mama), e doño di loke tabata un hotel pa cacho, a papia cu prensa den presencia di su abogado. Van Veen ta refuta e cargonan cu tin contra dje y a purba splica su banda di medaya, repasando puntonan di loke a pas'e dos siman pasa. Segun van Veen, ningun momento por acus'e di maltrato pasobra tanto e como su mama tabata den mesun situacion. E cachonan (varios tabata di dje si) mayoria tabata di e persona Aleman conoci como Kiki, cu tabata trece cachonan 'rescata' p'e pa cuida. 

COMIENSO DI HOTEL

Despues cu su mama a cuminsa un dog hotel na 2008, cosnan a bay malo na 2012 financieramente y el a cambia di operacion y cuminsa yuda Kiki cu su cachonan. Mientras cu no tabata mucho cla cuanto cacho tabatin na tur, van Veen a conta cu por lo menos 13 cacho (seccion meymey di e tereno) tabata di dje y cu tabata den bon estado. Cachonan cu tabata dilanti, tabata esnan cu tabata recupera y cu tabata haya remedi. Porta nan no tabatin cabey e ora ey, pero nan no tabata contagioso mas y e cabey tabata den proceso di crece. Patras tabatin esnan mas malo cu tabatin posiblidad pa contagia y problema cu nan cuero. Y ta ora cu polis a drenta dos siman, habri tur porta, e cachonan a bruha den otro. Y ta aki, segun van Veen, cu polis a mata tur e cachonan. E version sinembargo dos siman pasa, tabata cu ta servicio veterinario ta esun cu a pone e cachonan drumi, y no polis.

CACHO DEN FREEZER

E parti di cachonan haya den fridgidaire y freezer tambe a haya un splicacion. Ta trata di cachonan cu a muri y cu tabata wordo gevries pa wordo dera despues. Si antes un cacho morto tabata wordo dera mesora, esaki ultimo tempo el a bira un problema pasobra esun cu tabata bay dera nan, tabata malo. Como tal e cachonan tabata keda den freezer pa evita cu nan lo por a daña y hole stinki. "Mescos cu ta haci cu hende ora cu nan muri y ta pone nan den freezer". 

DETENCION BASA RIBA NEGLIGENCIA

Van Veen a splica cu el a wordo deteni a base di negligencia y cu su detencion a dura un siman. Actualmente e mama ta keda cerca su ruman muher Sheila, y ta ricibi su remedi regular di Alzheimer, cual remedi e tabata ricibi tambe tur dia tempo nan tabata na Tanki Flip. Colaboracion di e storia cortesia BonDia Aruba y foto Canal 22.