Consternacion pa rij largo di turista pa control na aeropuerto

ORANJESTAD - Algun potret cu a circula riba Facebook diahuebs atardi di rijnan largo di turista para cu maleta na aeropuerto wardando pa pasa control di douane, rapidamente a causa e consternacion necesario. A resulta cu tabata un control rigoroso di dos dia di douane na aeropuerto riba pasaheronan yegando Aruba. Mirando e impacto cu esaki a causa, y e impresion di liña largo cu posibel impacto negativo riba nos turismo, a bin orden 'di ariba' pa para esaki mesora. Esaki mirando cu tin festival grandi e weekend aki cu por perhudica e impacto. "No por ta posibel. Net awor cu tin Soul Beach. Aruba ta wordo perhudica", tabata comentario cu por a tende. Di parti di douane, sindicato SADA su presidente a reacciona mesora na NoticiaCla.com, contradiciendo e kehonan y refutando tur acusacion. 

PERHUDICA TURISMO Y CONCIERTO 

Presidente di e sindicato di douane SADA, Eduard Maduro ta lamenta esaki cerca NoticiaCla.com, ya cu segun Maduro, 'ta nos trabou nos tabata haciendo'. Pero e critica tabata fuerte riba e hecho cu douane a scohe net e dos dianan aki pa haci e controlnan aki ora cu miles di turista tabata yega Aruba pa e Soul Beach Festival. A compronde cu e mandatario di turismo tambe no a gusta e situacion cu el a tuma nota di dje y no tabata contento. Ora cu NoticiaCla.com a tuma contacto cu e mandatario, su comentario tabata breve pero directo: "Mi ta lamenta esaki!" Oduber a bisa NoticiaCla.com, refiriendo na e hecho cu turistanan lo mester a para oranan largo den rij, prome cu nan por a sali for di e area di maleta. Personanan cu tabata para den rij y cu a yega di otro destinacion y a haya nan para den e mesun rij, a sigura NoticiaCla.com cu nan a para por lo menos 1 or y 20 minuut. Y tumando nota di e declaracion di douane, nan a mustra cu e declaracion di douane no ta cuadra. "E no ta berdad!" ta e reaccion cu nan a bisa NoticiaCla.com. Ademas a reclama cu tabatin dos hende so y un machine. Algo tambe cu douane a desmenti. 

RIJNAN LARGO

Segun Maduro, enberdad e ultimo dos dianan a cuminsa cu control riba tur pasahero, incluyendo esnan cu tabata bin for di Merca. E impresion lo a wordo crea cu 'turistanan for di Merca' ta wordo trata estilo VIP, y cu esey lo tabata duna turistanan ey un 'free pass' pa drenta cu cosnan sin cobra impuesto y of bin cu cosnan 'illegal' manera droga y arma. Cosnan cu ultimo tempo a bira un hecho. Maduro a mustra NoticiaCla.com cu den apenas dos dia e control a duna su fruto. A bin gara basta droga di turistanan cu tabata yega Aruba for di Merca. Algo cu normalmente ta sosode net contrario. E presidente di e sindicato di douane a mustra cu controlnan asina ta evita cu e.o. arma tambe of otro obhetonan illegal manera harpoen ta drenta Aruba. Ademas a logra cobra turistanan riba cosnan cu nan mester a declara. E critica cu tabatin filanan largo cu tabata dura oranan largo, Maduro a mustra cu no tabata completamente berdad. E ta admiti cu enberdad e  filanan tabata largo pero mirando e cantidad di personal cu tabata presente, cos a bay hopi liher. E mas cu un turista por a para den rij tabata 20 minuut y ni tabatin ningun keho di turista riba e control. Ademas, e critica cu tabatin discriminacion riba e turistanan di color cu tabata yegando Aruba pa e Soul Beach  Music Festival cu ta e weekend aki, no ta berdad. "Tur ta critica y kehonan sin base. Hendenan cu no sa e trabou na douane y ta critica riba social media sin sa, no ta corecto" Maduro a bisa. 

ORDEN DI ARIBA PA BAHA MAN RIBA CONTROL

Lamentablemente orden a bin di ariba, pa para e controlnan manera cu nan tabata tuma lugar. "Lastimamente nos a bin compronde di e hefe di seccion cu aparentemente a compronde for di directeur cu orden a bin di ariba pa baha e control cu ta bin di continente mericano. Nos ta haya esey un lastima" Maduro a bisa. Segun e douanero sindical, awor cu douane ta haciendo su control debido, cu no tin nada cu a scapa douane, e director a pone un stop. A dicidi cu ta reuni diabierna atardi cu minister pa wak pakico esaki a tuma lugar. "Lamentablemente nos no a haya e backing di leiding  y nos ta bisa cu pa straño cu por zona, nos no por haci nos control manera mester haci'e". 

KIER PERHUDICA SOUL BEACH Y TURISMO?

Riba e critica pakico douane a scohe net e dianan cu e turistanan di Soul Beach tabata yega, y cu tabata perhudica esaki y nos turismo, Maduro a desmenti esaki y mustra cu e fluho tabata hopi lihe y cu no a haci nada intencional pa stroba nada. "Ningun momento turistanan a warda mas cu un ora. E peak hours tabata entre cuarto pa 1 pa 3'or. No por bisa cuanto pasahero a handle, pero e critica di un ora ta un hilaridad" Maduro a sigui bisa. E asunto cu tabata discrimina hende di color tambe, ta infunda. "Algun luna pasa tambe nos tabatin tipo di control asina y ningun hende a critica. No ta matter ken ta para nos dilanti. Semper e tendencia tabata si cu tabata trata e turista mericano VIP y otronan no". Loke cu Maduro a lamenta tambe ta cu mesora a cuminsa yama minister, cu a pone paro riba e control. FOTO front tuma di facebook.