Bikker: Agresion contra ser femenino no ta acceptabel bou ningun circumstancia

ORANJESTAD - Agresion contra ser femenino no ta aceptabel bou ningun circumstancia. Esey tabata prome reaccion di lider di partido Democracia Real Andin Bikker, un mainta despues di e 'bululu' den parlamento ora cu e dos cabesnan di parlamento a drenta den un disputa cu a resulta den agresion. Segun Bikker, ta di lamenta cu e lider di partido di AVP, esta Promer Minister Mike Eman, no a premira y interveni referente e diferencia di opinion cu a causa e polemica den Parlamento entre Dammers y Lopez-Tromp, cual diferencia di opinion ta bibando pa basta dia caba, segun Bikker. "Esey ta mustra un bes mas e ausencia di sr. Eman como lider kende a scohe pa ta mas den exterior cu e ta na Aruba y ora e ta na Aruba rara bes e ta bin Parlamento. Su ausencia y falta di liderasgo bien por ta e rais di e frustracion y falta di comunicacion cu a hiba na sorto di incidentenan lamentabel asina" Bikker a sigui bisa. 

OBSERVACION

Segun e lider politico, en todo caso di loke por a observa y scucha di e actuacion violento y expresionnan ofensivo di parti di Chris Dammers durante e suseso, esey no ta manera di trata un ser femenino. "Ningun tipo di splicacion di parti di sr. Dammers lo por hustifica un trato asina ora ta trata di un ser femenino. Pues PDR ta kere cu sr. Dammers lo haci bon di por lo menos ofrece su disculpa y reflexiona profundamente riba su posicion" Bikker a bisa. 

IMAGEN DI PARLAMENTO

Mas aleu PDR por a constata cu un bes mas e imagen di Parlamento den su totalidad a wordo poni de un lus menos bunita, cual ta kita atencion for di e trabou crucial di Parlamento, esta controla Gobierno como e organo co-legislador cu ta representa e digno Pueblo di Aruba. Lamentablemente no ta prome biaha cu e nivel den Parlamento ta laga di desea. PDR a mustra varios biaha riba esaki y aunke fraccion di PDR no ta participe den rebaha e nivel di reunionnan, e refleho ta riba Parlamento den su totalidad.