Roberto Rincón ta keda den prizon, amigo ta liber bou fianza

HOUSTON - E comerciante petrolero Venezolano Roberto Rincón tin cu permanece den prizon, pendiente su sentencia y amigo petrolero Abraham Shiera por sinta warda castigo na cas, despues di paga fianza. E diferencia ta cu Shiera a admiti culpabilidad di 1 biyon dollar na soborno pa contractonan lucrativo petrolero di PDVSA. Despues di paga fiansa di 1 miyon dollar, Shiera por a bay cas y warda su sentencia eynan. 

CARGONAN

Ambos persona, amigo di otro a wordo acusa di violacion di e acto di practica corupto internacional. Shiera lo tin un banchi electronico bisti na su enkel y ta haya aresto domicilario. Ademas e ta prohibi di uza dos avion priva cu e ta parti doño. 

E CASO

E conocido empresario petrolero Venezolano, Roberto Rincón a keda deteni na december 2015 na Texas, Merca, sospecha pa labamento di placa. Fuentenan a revela cu parti di e investigacion riba Rincón, a basa nan mes riba operacion, cu e tabata realisa na Aruba y Merca. Rincón, ta vincula cu e compania petrolero Petroleos de Venezuela (PDVSA) y ex director di inteligencia, Hugo “El Pollo” Carvajal. Ambos tin di haber cu Aruba. Rincón y dos otro persona, lo presenta dilanti corte federal di Houston, Texas, dialuna mainta.

MOTIBO DI DETENCION

Rincón a keda deteni, bou sospecho di cu el a viola e sancionnan, estableci pa e oficina di control di activo di extranheria, y pa participa den un red amplio di labamento di placa, di fondo procedente di Venezuela cu ta involucra PDVSA.

RINCÓN NO DESCONOCI PA ARUBA

Rincón no ta un desconoci na Aruba, y de hecho, tabata frecuenta nos isla, y tin algun propiedad, incluyendo residencia, na Aruba. Na 2014, ora cu e ex general Venezolano a yega Aruba, riba un avion priva di Rincón, el a hala atencion di autoridad Mericano e tempo ey caba. Tanto Rincón como Carvajal, tabata busca pa Merca y ta riba peticion di Merca, a detene Carvajal e tempo ey. Pero intervencion Hulandes, a pone cu a laga Carvajal liber e tempo ey. Fuente REUTERS.