Wever-Croes: MEP ta condena y desaproba abuso verbal y fisico den parlamento

ORANJESTAD – MEP ta condena y desaproba abuso verbal y fisico den parlamento. Asina lider di partido MEP, Evelyn Wever-Croes a duna como prome reaccion riba e bululu cu a sosode den parlamento. "Den nomber di fraccion di MEP den Parlamento y den nomber di partido MEP, mi ta expresa mi desaprobacion total pa e falta di respet den Parlamento y e abuso verbal y fisico entre e presidente di Parlamento sra. Marisol Lopez-Tromp y vice presidente di Parlamento sr. Chris Dammers diaranson 25 di mei" Wever a bisa. Segun e lider di partido, falta di respet di e forma ey, ni agresion verbal ni fisico ta wordo tolera ni acepta den e fraccion geel y tampoco den Parlamento. Cualquier cu por ta e diferencia di opinion, hamas esaki por hustifica agresion den ningun forma, y especialmente nunca agresion fisico den Parlamento. 

STOP DI PENSA CU POR FALTA RESPET NA HENDE MUHER

"Personalmente mi ta añadi cu hende mester stop di pensa cu por falta respet na hende muher asina facil. Tur loke ami mes a mira y scucha parlamentarionan di AVP bisa y haci cu Marisol Lopez-Tromp den ultimo tempo, den MEP hamas a pasa y tanten ami ta lider hamas lo pasa tampoco! E forma con parlamentarionan di AVP ta trata otro, y e falta di respet cu segun nan ta masha normal den nan reunionnan, tin mi totalmente asombra" Wever a sigi bisa.  

SANCCION PA ESNAN RESPONSABEL

"Nos a expresa nos desaprobacion den un carta pa Gobernador, Presidente di Parlamento y Minister President den cual nos a condena e sucedido. Tambe nos ta urgi pa un investigacion wordo haci cu urgencia y pa e rapport di investigacion wordo finalisa pronto pa asina wordo trata den un reunion publico den Parlamento mas pronto cu ta posibel pa esnan responsabel wordo teni responsabel tambe pasobra e hecho aki no por keda sin sancion". Parlamento na e momento ey tambe lo debati riba e cambionan cu mester bin den e Reglamento di Orden di Parlamento pa evita cu algo asina ripiti."

Ela urgi prome minister Mike Eman, lider di partido AVP, pa atende cu e asunto aki cu prioridad, mirando e berguensa cu esaki ta causando nos pais. Segun Wever, esaki ta simplemente un simptoma di e malesa di mal gobernacion di e gobierno aki. "Mike Eman awor si mester duna cara y mustra na cual banda e ta para y si e ta sostene abuso contra hende muher of si e tambe ta conden’e" Wever a sigui bisa.

ZERO TOLERANCIA

"Un cos mester keda bon cla: MEP no ta tolera ni acepta cu hustamente den e sala cu nos mester defende nos muchanan, nos hende muhernan, nos grandinan, ta abusa di hende muher! E sucedido di awe tin mi den shock, hamas mi a pensa cu asuntonan di trabou den e fraccion di AVP ta wordo atendi di e forma ey. Den fraccion di MEP algo asina HAMAS a sucede, y tanten cu ami ta lider di MEP esaki hamas lo pasa tampoco!" Wever a bisa finalmente.