Fraccion AVP ta distancia su mes y desaproba cualkier forma di violencia

ORANJESTAD - Fraccion di AVP ta distancia su mes y desaproba cualkier forma di violancia. Despues di e bululu cu a sosode den parlamento diaranson mainta entre dos colega di partido,- actual vice presidente y presidente di parlamento Chris Dammers y Marisol Lopez Tromp respectivamente-, Desiree de Sousa Croes na nomber di e fraccion a duna e prome reaccion oficial di e fraccion. Rene Herde ta den exterior preparando pa e reunionan di IPKO y no tabata presente. Mes momento de Sousa a bisa NoticiaCla.com cu e  fracccion 'ta pidi disculpa na Pueblo di Aruba pa e comportacion di dos di su miembronan den sala di Parlamento'.

PAPIA CU E PERSONANAN ENVOLVI

Segun de Sousa, ela purba pero no a logra papia cu Marisol Lopez Tromp. Tambe a confirma cu si a papia cu colega Dammers y a scucha su banda. "Fraccion di AVP ta distancia su mes y desaproba cualkier forma di violencia. Cada miembro di fraccion di AVP ta responsabel pa nan mes accionnan y e consecuencianan di esakinan" de Sousa a finalisa bisando den un comentario breve na NoticiaCla.com riba e suseso.