Control severo riba waf contra taxista y tour operator

ORANJESTAD – Reclamo di turistanan crucero riba actuacion incorecto di e.o taxistanan y otro instancia di turismo, a pone cu polis lo cuminsa cu controlnan na waf riba touroperator, taxista y personal di car rental y esaki lo ta pa un periodo indefini. Hunto cu polis, e personal di Aruba Ports Authority y DOPV lo conduci e controlnan aki. APA ta ricibi hopi reclamo di turistanan biahando riba barco crucero, cu ta acerca nan na un forma no corecto na nan salida for di e terminal pa taxistanan y representantenan di companianan di tour y companianan di huur auto. Polis ta conisdera cu como cu turismo ta sigui di ta e unico pilar di economia, mester salvaguarda esaki y haci un esfuerso extra pa e turista sinti su mes na cas, sigur y ta keda cu gana di papia bon di Aruba cu su amigonan y cu e deseo di bolbe pa un vakantie mas largo. DOPV lo ta controlando si e companianan y taxistanan ta cumpliendo cu e rekisitonan pa cu transporte publico y Polis lo ta encarga cu e parti di control di documentonan, asina Lito Lacle, vocero di polis a splica.

E prome barco crucero ta yega nos isla 7:30am y for di e momento ey e controlnan ta cuminsa. Dialuna ta e prome dia di control y e controlnan lo sigui pa algun tempo; no tin un dia specifico pa stop.