Hooyboer: Colegio a manda carta di admision sin cu proceso tabata cla

ORANJESTAD - Mester tin mas manera pa por evalua un studiante pa e por drenta Colegio, cu solamente un test manera cu e ta aworaki. Esey ta e punto di salida di minister di enseñansa Michelle Hooyboer Winklaar. Mes momento e mandatario a confirma na NoticiaCla.com cu e proceso pa selecta studiante pa Colegio no a termina ainda y cu ainda tin mas mucha cu lo por wordo acepta. Loke a pasa ta cu Colegio Arubano a actua prematuro y manda carta pa alumnonan cu a pasa test, sin warda pa e conseho final. Ora cu NoticiaCla.com a pidi reaccion di presidente di SMOA Bart Kool, el a confirma cu enberdad e proceso no a caba y cu diabierna awor e combersacionan ta continua. 

TEST UN STUDIANTE RIBA UN SOLO TEST

E mandatario di enseñansa a mustra cu su precupacion ta e hecho cu ta test mucha a base di un solo test, y esey no ta e miho forma pa evaluoa un alumno pa e por drenta Colegio. Entre nan ta duna e ehempel cu si un alumno ta score halto riba tur su materianan, pero ta score un poco mas abou pa e materia di hulandes, e alumno no por drenta Colegio. Algo cu no por ta asina. "Mester tin mas forma pa por huzga un studiante potencial" e mandatario a bisa. Y como tal a bin cu e ley nobo unda cu ta trece cambio den e normanan poni pa admiti un alumno pa e.o. Colegio. Y ta pesey awor tin e posibilidad aki compara cu antes ora cu otro normanan tabata wordo usa. 

COLEGIO A ACTUA PREMATURO

Den caso di Colegio, e mandatario a mustra cu loke cu a sosode ta cu Colegio ,- sin warda e proceso final-, a core manda carta pa esnan cu a pasa den e prome parti. "A recorda e comision pa splica nan miembronan cu Colegio a actua prematuro" Hooyboer a bisa. E scolnan no por determina e normanan riba nan mes, e mandatario a bisa. 

RECOMENDACION DIABIERNA

A duna e comision te diabierna awor pa bin cu e recomendacionan haci, y basa riba esey, lo habri e toets pa mas mucha pa asina duna mas posibilidad pa mas alumno por drenta Colegio Arubano e aña escolar nobo 2016/2017. Esaki sinembargo lo no afecta esnan cu ya caba a haya un carta cu nan a wordo acepta pa drenta Colegio. "Nada ta pasa cu e grupo aki" Hooyboer a sigura NoticiaCla.com.