Plasterk: No ta spera migracion di gran escala di Venezuela pa Aruba

DEN HAAG - "Gobierno Hulandes ta monitoria e situacion na Venezuela hopi di cerca. Pero ainda e situacion no ta di tal indole cu por spera un migracion di gran escala (di Venezolano) pa islanan Caribense di Reino Hulandes". Asina minister Hulandes Ronald Plasterk ta contesta parlamentarionan di partido VVD Andre Bosman. Origen sinembargo di e serie di contesta no tabata directamente riba esey, sino riba e situacion di falta di comunicacion na Venezuela (problema cu dos compania di telefon celular). Tabata na final di e contestanan cu Plasterk ta referi riba un pregunta cu ta trata e migracion y e preocupacion di Hulanda. 

INFLUX CHIKITO

Segun Plasterk su contesta, e ultimo lunanan por papia di un influx chikito di Venezolano pa particularmente Aruba y Corsou. Mes momento Plasterk ta mustra tambe cu tanto Aruba como Corsou a tuma medida pa  frena e migracion illegal aki (cu manera Plasterk ta reitera, ta un autoridad netamente di e islanan). A haci mencion di control mas estricto na aeropuerto y a fortifica e exigencia pa migracion. Mientras cu gobierno (Hulandes) no ta preocupa ainda cu e migracion, nan ta conciente di cualkier forma di migracion. Y segun e mandatarionan Hulandes, nan ta den contacto continuo y estrecho cu e respectivo gobiernonan.