Ten Broeke: Kier sa si awor si gabinete Rutte ta sostene idea pa visa pa Venezolanonan

DEN HAAG - Mirando cu e situacion na Venezuela a empeora (compara cu algun luna pasa) pa loke ta e situacion di seguridad y su posibel implicacion pa Aruba, parlamentarionan Hulandes Ten Broeke y Bosman (ambos VVD) a haci pregunta recientemente (20 di mei 2016) riba e situacion actualisa y acerca awor, e asunto di visa pa Venezolanonan pa por drenta Aruba. Den un carta dirigi na ministernan Hulandes Ronald Plasterk y Bert Koenders (Asunto di Reino y Relacion Exterior respectivamente), nan ta haci 5 pregunta cu ta a rais di un articulo cu a sali den NoticiaCla.com recientemente riba e tema. 

SITUACION VENEZUELA A EMPEORA

E prome pregunta ta pa haya sa kico mandatarionan Hulandes ta pensa riba e 'pensamento' di minister di Aruba pa cu introduccion di visa awor, compara cu prome. Pero esun cu mas ta hala atencion porta ta esun unda cu e parlamentarionan kier sa si, compara cu contestanan anterior duna (4 di december 2015) si ainda e mandatarionan ta pensa mescos. Esey mirando cu e situacion na Venezuela a empeora. Basa riba esey, nan kier sa si ainda no tin motibo pa preocupacion pa introduci un visa pa Venezolanonan. "Minister ta comparti e punto di bista di e minister 'cu no por cera wowo pa e situacion aki unda cu e influx for di Venezuela casi no por wordo controla?'", nan ta puntra. 

TRATA VISA DEN REUNION

Tambe e parlamentarionan kier sa si e posibilidad pa introduccion di un visa pa Venezolano,- mirando cu ta trata di un asunto di Reino-, a wordo discuti den e ultimo consulta anual riba e tema entre e 4 paisnan di Reino Hulandes. Si esey no ta e caso, e parlamentarionan kier sa pakico. A base di e declaracionan recien di e mandatario (di Aruba), nan kier sa si e mandatario(nan) ta dispuesto pa atende cu e preocupacion di hopi riba e tema den un proximo momento relevante. Y cua momento nan ta considera relevante y si ta dispuesto pa informa parlamento despues di e resultado aki. 

VISA CONDICIONA? 

Y finalmente mirando cu minister di turismo di Aruba Otmar Oduber kier condiciona e visa pa Venezolano, si esaki ta algo realistico y alcansabel y mas ainda, deseabel. E mandatario di Aruba a haci esaki comokiera cu si pone un visa general, e por afecta un grupo grandi di Venezolano cu si ta positivo pa economia di Aruba. Aki ta referi na entre otro esnan cu tin propiedad, y of cu ta gasta placa manera cu hopi Venezolano ta(bata) conoci p'e. P'esey e intencion di un posibel visa condiciona. Te aki e serie di pregunta. Foto cortesia www. refdag.nl