WEB cu presentacion pakete di educacion di awa y energia sostenibel pa maestronan

ORANJESTAD – Siman pasa durante e conferencia di celebracion di 25 aña IPA, WEB Aruba a tene un sesion special pa maestronan. ‘E conferencia di IPA a pas perfectamente cu un di WEB su iniciativanan strategico, esta di participa activamente den educacion sostenibel, den e caso aki, di educacion di awa y energia sostenibel.’ Asina Asja Dongen, relacionista publico di WEB Aruba a splica. WEB Aruba no solamente tawata un di sponsornan principal di e conferencia, sino tambe un di e presentadornan.

Representante di gerencia, Giovanni Bermudez a duna un discurso na gruponan di interes den e area di educacion. E team di PR di WEB Aruba riba su turno a tene un sesion special pa informa maestronan di e pakete di educacion di awa y energia sostenibel. Segun Asja Dongen ‘cu e pakete WEB kier enforsa educadornan pa splica alumnonan con ta desalina awa y produci energia aki na Aruba.’ E meta principal ta pa conscientisa muchanan y hobennan di e importancia di uza awa y coriente conscientemente. 

E esfuersonan di WEB pa educacion di produccion di awa y energia sostenibel ta data for di 2013. E tempo ey WEB a contribui na e Green’s’cool Education Symposium cu a enfoca directamente riba hobennan. ‘Despues nos a dicidi di enfoca riba maestronan, cu de facto ta e personanan mas capacita pa trece e mensahe over.’, asina sra. Dongen ta splica.

Asina a nace e asina yama ‘E-Proyect’ cu ta un pakete di educacion atractivo, tanto pa e maestro como pa e alumno. E pakete educativo ta resultado di un trayecto di compilacion di material, presentacion na gruponan di docente y adaptacion di e material pa yega na e producto final. Durante e proceso a tene diferente encuentro informativo cu docentenan, pero tambe cu representantenan di Bureau Innovatie, IPA y Bureau Curriculum Ontwikkeling di Directie Onderwijs. 

E pakete educativo ta consisti di un serie di pelicula cortico, manual pa docente, pregunta y tarea practico pa alumno y hermentnan pa haci e tareanan practico. Un parti di e material ta enfoca riba e tecnica di procesa awa di lama pa awa di bebe. E otro parti ta enfoca riba energia sostenibel y e aspectonan envolvi pa uzo di energia sostenibel riba un isla chikito manera Aruba. Basa riba e pakete aki, Sue-Ann Lo-Fo-Sang y Noémi Rasmijn studiantenan di ultimo aña di IPA a traha un ‘ontdekdoos’ cu diferente wega educativo pa muchanan chikito. 

Sra. Dongen a finalisa bisando cu WEB ta hopi contento di a contribui na e conferencia di IPA. WEB ta extende palabra di felicitacion na gerencia y empleadonan, fundadornan, studiante y ex studiantenan di IPA cu e di 25 aniversario di e instituto prestigioso aki.