Autoridad Venezolano a frustra traficacion di Colombiano ilegal pa Aruba

PUNTO FIJO - Autoridad Venezolano  Cicpc (Cuerpo de Investigaciones Científicas, Penales y Criminalísticas)  a detene dos Venezolano pa traficacion di Colombianonan pa Aruba. Asina e periodista Gerardo Morón Sanchez di e portal Venezolano 'Diario Nuevo Dia' di e estado Falcón ta raporta.  Aparentemente desde cu a elimina visa pa Colombianonan, esaki a bira un negoshi lucrativo unda cu pa 100 dollar, ta trafica Colombianonan pa Aruba y posiblemente Corsou tambe. Den e caso aki, e operacion a bay malo y a detene e culpabelnan prome cu e Colombianonan por a wordo trafica pa Aruba. 

E OPERACION

Funcionarionan di e seccion di Cicpc di Punto Fijo a detene dos Venezolano pa 'ingreso fraudulento di tres Colombiano pa Venezuela na Villa Marina, municipio Los Taques. E corant Venezolano ta raporta cu Yunior David  Valencia, Ose Jilson Martínez Valencia y Elvis Johán Solis Mosquera a drenta Venezuela ilegalmente na e frontera di e estado Zulia, unda cu no a pasa e control migratorio. E Venezolanonan Liebnitz Junior Godoy Valero y Andrés Josué Tigrera Melián, ambos di e estado Zulia tabatin e papel di fungi como "Coyotes" y trece e Colombianonan pa e peninsula di Paraguana, di unda nan tabata hiba Colombianonan cu boto pa Aruba (pagando 100 dollar pa cabes) unda cu e Colombianonan lo a drenta di forma ilegal, solamente cu un pasaporte den nan man. Esaki a aumenta desde cu Aruba a elimina visa pa Colombiano na december di aña pasa. For di e fecha di 3 di december Colombianonan no mester di visa mas pa drenta Aruba. Y for di esaki, a nace un negoshi 'lucrativo' di traficacion di hende cu aworaki a keda frustra pa autoridad Venezolano.