Richardson: Aki un luna Rocco Tjon por traha como director na KIA

ORANJESTAD - Mas probabel cu pa fin di proximo luna actual inspector di polis Rocco Tjon lo traslada pa KIA pa inicia su funcion nobo como director di KIA. Esaki su hefe directo, alto mando di polis Dolfi Richardson a confirma na NoticiaCla.com dialuna atardi. Despues cu minister di husticia Arthur Dowers a confirma cu Tjon a keda apunta como e director nobo di KIA, e pregunta a keda ki tempo exacto esaki lo sosode. Segun Richardson, tin trabounan cu Tjon tin cu caba ainda na KPA, y ta kere cu esaki lo dura por lo menos un luna mas. 

TJON TA MAN DRECHA

Richardson a admiti tambe cu Tjon ta su man drechi y e ta recuri na dje tur dia pa conseho. Y pa loke ta e nombracion di Tjon como director di KIA, e inspector a consulta cu Richardson prome cu e tuma e posicion aki. "Mi tabata na altanto cu e kier a enfrenta e reto nobo y esey ta algo semper cu mi ta trata di stimula tur mi coleganan momento cu nan ta sinti cu nan kier haci tal" Richardson a bisa. "Sigur sigur mi a stimul'e den e desicion aki y manera mi a bisa, semper mi lo dun'e e respaldo y nos t'ey p'e". 

MAXIMO UN LUNA CU E MESTER

E loke a zona 'straño' ta ora cu e mandatario di husticia a bisa cu posiblemente e fecha pa Tjon cuminsa ta 1 di juni, pero cu ta korpschef ta dicidi ki dia e por bay. "In goed overleg nos lo wak e termino di traspaso" Richardson a bisa inicialmente. Riba insistencia di NoticiaCla.com, Richarson a specifica e fecha mas, indicando cu tin algun proyecto cu mester keda cla y algun asunto cu tin cu aclarea ainda. E momento cu esey ta cla, Tjon por haci e traspaso pa KIA. Mirando cu e fecha di 1 di juni ta otro siman, ta dificil cu Tjon por keda cla pa e ora ey caba. "Maximaal un luna e por dura" Richardson a bisa, pa loke ta e fecha cu Tjon lo por cuminsa traha na KIA. 

SELECCION

Manera cu NoticiaCla.com a raporta dialuna mainta, ta for di un grupo di 3 candidato, inspector di polis Rocco Tjon a keda selecta pa bira e proximo director di nos prizon conoci como KIA. Minister di husticia Arthur Dowers dialuna mainta a confirma e noticia pa NoticiaCla.com y a indica tambe cu ta depende na su actual doño di trabou  (KPA) ki dia e por cuminsa cu su labor nobo. E intencion ta pa Tjon cuminsa traha entrante 1 di juni na KIA den su funcion nobo. Asina Tjon ta reemplasa Trudy Hassell (formalmente) y majoor Maduro cu temporalmente a dirigi KIA despues cu Hassell a retira di e funcion. 

APROBACION CONSEHO DI MINISTER

Tabata den Conseho di Minister diabierna siman pasa cu a aproba e nombracion di Tjon como e persona 'mas ekipa' y miho for di e procedura. "Awor ta cuminsa cu e proceso di introduccion di sr Tjon na KIA y ta depende di cuerpo policial ki momento e por cuminsa cu su trabou"  Dowers a bisa. Pa loke ta su 'opdracht' principal cu Tjon ta haya, ta pa trece paz bek den e instituto, y introduci procesonan cu mester keda cla. Entre nan tin e parti final di e reorganisacion di KIA. Tin hopi aspecto di cuido diario den prizon, condicion fisico di e prizon y mas. Pero ora cu introduci e inrichtingsplan nobo, mester adkeri personal y managers nobo cu ta bira entre otro tambe e prome tarea di e director nobo.