Cantidad di Venezolanonan pa Aruba a baha drasticamente

ORANJESTAD - E cifra di e grupo di Venezolanonan biniendo Aruba a baha drasticamente for di januari ultimo. Hefe di IASA (Imigracion) esta Gerald Vingal a confirma esaki pa NoticiaCla.com dialuna atardi. "Esey no kiermen cu nan ta stop di bin. Pero nan no ta haya e dollarsnan manera antes mas " Vingal a bisa. E trabou preventivo di polis y Kustwacht ta funcionando hopi bon riba lama y riba costa. "Di mes mi tambe lo prefera pa bo no laga nan (Venezolanonan) ni drenta pasobra si bo laga nan drenta bo tin gasto, pues mi ta full contento y ta para 100% tras di nan (polis y kustwacht)" Vingal a sigui bisa. 

MEDIDA TA KEDA NA VIGOR

E medidanan amplia (entre otro pone bali extra djies pa atende e fluho di Venezolano) no a cambia of baha si. "E 100% controle ta keda, pasobra n' ta un maneho cu gobierno a cambia of cu e monetaire situatie (na Venezuela) a drecha. Ainda nos ta check e 100% controle riba cash. Y nan mester tin e dollarnan (cash) manera e mesun control cu nos a haci vanaf 1 augustus/september cu nos a bin cu e introduccion di cash so, ta na vigor ainda".