Caso Magnus ta termina cu sla pa famia y alegria pa un sospechoso

WILLEMSTAD – Cu cara na laira, e sospechoso den caso Magnus, Burney “Nini” Fonseca a sali for di e prison Bon Futuro diabierna atardi, brasa pa entre otro su mama. “Dios bendiciona tur hende” tabata su unico palabranan. Bisti completamente na blanco, cu short y un t-shirt, Fonseca awor por warda su caso bin dilanti, -posiblemente aki 4 luna-, sinta na cas, sin paspoort. “Mi cliente no tin problema pa esey y lo cumpli cu tur cos” abogado di Fonseca, Marije Vaders a bisa di su cliente. “Claro cu mi ta contento” e la sigui bisa di e hecho cu hues van Dam a laga su cliente liber temporalmente.

Loke no por compronde ta e hecho cu awor kier pone para como sospechoso den e otro caso, esta ‘Maximus’ pasobra aki tampoco e no tin ningun envolvimento segun abogado Vaders.

Pa ministerio Publico, ta considera e libertad aki como un sla duro, pasobra tabata considera Fonseca como un posibel persona clave cu mester a conduci na detencion di esnan cu a duna orden pa mata politico Helmin Wiels na mei di 2013. “Mi ta hopi decepciona den husticia na Corsou” Aubert Wiels a declara despues di e caso. E ta considera esaki un siman perdi, y cu un resultado final asina unda cu un di e personanan mas principal ta bay cas, como algo hopi malo.

E otro sospechosonan tambe a hiba palabra, cu excepcion di Fonseca. Kuwas a mustra cu e no por pidi despensa na e famianan di tanto Wiels como e otronan cu e ta wordo acusa di dje, pasobra e no a haci nada. E la pidi hues tambe pa tin husticia pe y pa cos por bay den un forma cu ta corecto. Ora cu hues a puntre si e kier ta presente pa e sentencia, dia 29 di augustus proximo, e la nenga mesora.

No ta conoci si Kuwas ta biaha bek pa Hulanda awor pendiente e sentencia, of si e ta keda Corsou pendiente e resultado di e veredicto. Un siman cu a tene Corsou completo den su gara di e caso Magnus, cu awor a caba y ta warda e veredicto fin di luna. Pa Kuwas, ta ward’e bida largo, pa Damascus 20 aña y pa Pieter 5. Si hues ta tene su mes na e peticion di fiscal, ta bira conoci dia 29 di augustus, pa 9’or di mainta. Foto cortesia Dick Drayer.