Resultado admision na Colegio no a bai segun ley y procedura nobo

ORANJESTAD -Resultado di admision na Colegio no a bai segun ley y procedura nobo. Asina minister di enseñansa a declara den fin di siman. Segun e mandatario, recientemente el a anuncia cu a formalisa un “Ministeriële Beschikking” (MB) pa instala un comision pa evalua y determina normanan nacional pa admision pa ciclo basico di Havo/Vwo. E instalacion di e comision aki ta a base di e cambionan cu Minister di Enseñansa a introduci den ley (Landsbesluit dagscholen mavo, havo, vwo) cu ta regula entre otro e scolnan Colegio San Nicolas y Colegio Arubano. Pero aparentemente cos no a bay manera mester ta. 

TRANSICION 

E transicion di scol basico pa scol secundario, y specialmente pa ciclo basico di Havo/Vwo, ta pa hopi aña caba un punto di discusion. Pa varios aña ta selecta alumnonan na porta a base di un toets cu ta determina pa 100% e admision na un scol pa Havo/Vwo. Prome cu e actual cambionan den ley e parti aki tabata completamente den man di e scol y/of directiva di scol. Cu e adaptacion den ley e norma di admision mester bira uno nacional, uniforme, transparente y teniendo na cuenta e capacidad y potencial completo di e mucha, y tambe conforme standardnan internacional, incluyendo Hulanda. E ley nobo ta prescribi un maneho y norma di admision cu ta basa riba mas cu un componente, cu no ta solamente basa riba resultado di un toets.  Hooyboer a stipula 12 di mei 2016 como deadline pa e conseho di e comision drenta na Ministerio di Enseñansa, esaki teniendo na cuenta e procedura di “aanmelding” y “bezetting” di e scolnan. Mientras cu e fecha di e deadline cu Hooyboer a stipula pa e comision tabata acerca Inspecteur General, cu ta encabesa e comision, a informa cu nan lo mester di poco mas tempo pero cu e conseho di e comision lo wordo entrega na Minister den cuestion di algun dia. Segun e mandatario, mientras cu e tabata pendiente pa e conseho di e comision pa cu e maneho di admision y normanan nobo cu lo ta aplicabel pa e aña aki, a tuma nota cu e scolnan a dicidi dia 16 di mei ultimo pa duna resultado di e “Colegiotoets” na e scolnan basico, na mayornan y e alumnonan caba. Algo cu a trece hopi confusion cerca e mayornan pero tambe cerca Minister mes, mirando cu te dia di awe ningun proposicion di e comision no a drenta na Ministerio di Enseñansa y door di esaki tampoco no por a wordo aproba y formalisa. Esaki ta implica cu e resultadonan di e admision no a bai segun ley y procedura nobo. Ora a tuma nota di esaki mesora Hooyboer a tuma contacto cu Inspecteur Generaal cu ta encabesa e comision pa asina haya mas claridad di kico por a bai robes den e procedura mirando cu e resultadonan di e “Colegiotoets” cu a wordo comunica no tin base legal. E mandatario ta haci e pregunta cardinal cu ta a base di ki maneho y norma a duna e resultadonan. Mientras cu no tin normanan aproba Colegio Arubano a bay asina leu di a hasta duna carta di aceptacion of unda cu a rechasa admision na algun alumno. Algo cu Hooyboer ta desaproba enfaticamente. Despues di varios reunion y corespondencia a bin resulta cu e scolnan a duna resultado di e “Colegiotoets” a base di un proposicion cu Colegio Arubano a trece dilanti den e comision. E proposicion a wordo discuti den e comision pero ningun votacion no a tuma luga ainda riba e proposicion aki y door di esaki no a formula e conseho ainda y manda esaki formalmente pa Minister pa aprobacion. Esaki ta implica cu e scol a handle riba su mes y a base di su propio proposicion y no a base di normanan nacional aproba. A bin resulta cu e proposicion di Colegio Arubano cu tin riba mesa atrobe ta basa solamente riba e toets, dus e no ta un proposicion incluyendo mas componente manera prescribi den e tarea di e comision. Inspecteur General a confirma cu e proposicion di Colegio Arubano ta riba mesa, pero cu ainda no tin votacion a tuma luga riba e proposicion mirando cu e otro miembronan di e comision mester a duna feedback riba esaki y/of bin cu proposicion alternativo. Inspecteur General a informa Minister cu diamars awo, esta 24 di mei, e comision lo bin bek hunto pa asina vota riba e diferente proposicionnan cu tin pa asina formula e conseho pa Minister. 

EVALUA SISTEMA 

Minister Hooyboer ta bolbe enfatisa “Cualkier sistema cu ta evalua nos alumnonan a base di solamente 1 indicador, den e caso aki un solo toets, no por ta husto ni efectivo. Un “moment opname” no por ta nunca e unico factor cu ta considera pa determina admision na un cierto scol. Un solo toets nunca por ta e unico instrumento pa premira e exito di un alumno y ki tipo di Enseñansa ta cuadra cu su capacidadnan. Esaki no ta aceptabel den nos sistema di enseñansa y esaki ta e motibo cu mi ta para fuerte pa trece cambio riba e practica aki y no lo tolera cu scolnan y directivanan di scol ta sigui cu e practica aki ni un aña mas.” 

WARDA RESULTADO

Hooyboer ta confirma cu e ta spera e conseho di e comision den transcurso di e dos simanan nos dilanti. Unabes esaki wordo aproba y formalisa door di Minister lo comunica esaki mesora na tur stakeholders. A base di esaki lo comunica e resultadonan final di e toets y e implicacion cu esaki tin pa cada scol y alumno. No ta conoci si esaki tin implicacion riba esnan cu a haya resultado caba.