Ministerio publico: No ta desmenti ni admiti caso di entrega di “Marquitos’

ORANJESTAD – Ministerio Publico no ta ni admiti ni desmenti informacion di NoticiaCla riba e supuesto plan di entrega di e capo di droga colombiano Marcos de Jesús Figueroa García, alias ‘Marquitos’ Figueroa. “Nos no ta papia over di esey. Nos no tin nada” vocero di Ministerio Publico, Ann Angela a sigui bisa NoticiaCla diabierna merdia. Como tal e noticia ta keda uno cu ta sigui hala hopi atencion, y cu ta hayando un rabo mas largo. Sigur mirando e trayectoria e anja aki di mas persona cu a of kier a usa Aruba como lugar di entrega. Y manera ta custumber, e silencio cu tin riba e casonan aki, aunke comprendibel, ta dun’e aun mas misterio cu riba su mes ta crea un bida.

Tabata diahuebs anochi cu NoticiaCla a trece e noticia aki, papiando di un di e caponan grandi colombiano di droga di e parti costa norte di Colombia, Marcos de Jesús Figueroa García, alias ‘Marquitos’ Figueroa, cu lo tabata na Aruba dialuna, haciendo tramite pa entrega su mes. Un informacion segun e corant colombiano 'El Tiempo' cu a publica esak. (lesa e publicacion aki) . Segun e corant aki, lo a señala Marquitos preparando pa entrega su mes. Si e la haci esaki no ta conoci. Loke tambe e corant ta señala ta cu den un operacion na Valledupar, a captura Armando de Jesus Gneco Vega, alias ‘Mandarino’, presunto asesino di ex diputado di Cesar Efraín Ovalle Oñate. Tambe a detene Orlando Mendoza Zuleta, ‘Guanábano’, y un muje identifica como Victoria Helena Mendoza Zuleta.

Tur ta hendenan clave dentro di e clan criminal di ‘Marquitos’, y como tal, ta considera esaki como un sla formal contra Marquitos. E ta implica tambe cu lasonan cu e ex gobernador di La Guajira esta Kiko Gomez. Esaki a keda confirma pa El Tiempo segun un oficial cu a participa den e operacion aki. Loke tambe e corant ta informa ta cu e capo ta buscando un acercamento cu e autoridadnan pa un posibel entrega y ta haciendo esaki na Aruba. Por corda algun tempo pasa, cu un otro capo tambe a entrega su mes na Aruba ora cu autoridad colombiano a bin y detene.

Ken ta Marcos de Jesús Figueroa García, alias ‘Marquitos’ Figueroa

Marcos de Jesus Figueroa Garcia, alias "Marquitos," ta un persona poderoso den e mundo bajo di e provincia nortost colombiano La Guajira. E ta parti di e hunta di directiva di e grupo criminal prominente Urabenjos. E la traha su network criminal door di trafica droga y gasoline di contrabanda entre Venezuela y Colombia, formando un partnership cu e ex gobernador di e mesun ciudad, Juan Francisco “Kiko” Gomez. Figueroa ta acusa di a ordena asesinato di varios politico regional, y como tal gobierno colombiano ta ofreciendo sumanan grandi di placa cu mester conduci na su aresto.