Control nacional di trafico a produci varios detencion

ORANJESTAD - Diabierna manece diasabra polis a para mas di 300 auto y a cera cu no menos di 12 detencion, a kita 4 rijbewijs y un chauffeur burachi y riba dje sin permiso di estadia of trabou riba nos isla a haya un multa di 950 florin pa paga cash, prome cu su deportacion for di nos isla. A tene varios accion, entre otro un cu a dura 1 ora y mey riba e caminda grandi na altura di Well Well na Santa Cruz y otro na altura di Baby Store na Piedra Plat. 

LANDELIJKE VERKEERSCONTROLE

Den cuadro pa por siña e studiantenan na Academia Policial E.J. "Watty" Vos algun articulo specifico den e ley di trafico, a dicidi pa organisa un asina yama "Landelijke Verkeerscontrole" hunto cu e ekipo di Polisnan Motorisa. E accion a tuma luga diabierna anochi y diasabra anochi na varios punto strategico riba nos isla.

DIASABRA MENOS DRUK

Diasabra manece diadomingo tabata menos druk riba caya, asina mes e Polisnan den e accion a para mas di 400 auto. Tabata para e autonan den grupo di 10 cada biaha. Na final di e anochi a detene 8 chauffeur, a kita 2 rijbewijs y a duna un multa di 500 florin. Ta bon pa bisa cu durante e accionnan ta pidi e chauffeurnan pa mustra nan rijbewijs, papel di seguro, prueba di pago di impuesto y nan keuringskaart valido. Tambe ta pidi e chauffeurnan pa coopera y supla pa asina controla e nivel di alcohol den nan rosea.